16 sentyabr 2011 17:54
DÇ-də ən uğursuz gün (YENİLƏNİB)
Türkiyənin İstanbul şəhərində güləş üzrə dünya çempionatı davam edir. Azerisport.az xəbər verir ki, yarışların beşinci günündə daha 3 güləşçimiz medal və London olimpiadasına lisenziya qazanmağa çalışıb.
Nadya Sementsova (67 kq) mübarizəyə Natalya Kukşina (Rusiya) ilə duellə başlayıb və qələbə qazanıb. Növbəti mərhələdə yaponiyalı Yoşiko İno üzərində də eyni uğuru təkrarlamaq lazım idi. Amma təəssüf ki, idmançımızın bu cəhdi uğursuz alınıb - 0:1, 1:0, 0:1. Qeyd edək ki, bu çəki dərəcəsində olimpiadaya lisenziya yox idi. Bu üzdən yaponiyalı idmançı finala çıxsa, Sementsova yalnız bürünc medal qazanmaq şansı əldə edəcəkdi. Amma İno da finala çıxa bilməyib və idmançımız turniri uğursuz başa vurub.
Dina İvanova (72 kq) ilk olaraq Pret Kaur (Hindistan) üzərində qələbə qazanıb - 2:0, 6:3. Onun növbəti rəqibi Belarus təmsilçisi Vasilisa Marzaliuk idi. Təəssüf ki, idmançımız 1/4 finala adlaya bilməyib. Amma məhz bu rəqibi finala adlayacağı halda İvanova həm lisenziya, həm də medal şansı əldə edəcəkdi. Təəssüf ki, onun da rəqibi çox uzağa gedə bilməyib və idmançımız nə medal, nə də lisenziya qazana bilib.
Mahmud Məhəmmədov isə startda (55 kq) Enq-Yub Kimlə (Koreya) mübarizədən qalib ayrılmağı bacarıb - 4:0, 6:0. Növbəti mərhələdə o, Daulet Niyazbekova (Qazaxıstan) da eyni aqibəti yaşatmalıydı. Lakin Mahmud bu dəfə məğlub olub - 2:2, 2:1, 0:2. Buna baxmayaraq, onun da medal və lisenziya şansları qalmaqdaydı. Amma Qazaxıstan güləşçisi də finala çıxa bilməyincə, DÇ-də ən uğursuz günümüzü yaşamış olduq.
Qeyd edək ki, ilk 4 gündə mübarizə aparan 9 idmançımızdan Rövşən Bayramov (55 kq) qızıl medal və lisenziya qazanıb. 84 kq-da yarışan Saman Təhmasibi London olimpiadasına sadəcə lisenziya əldə etməsinə sevinib. 48 kq-da yarışan Mariya Stadnik həm lisenziya, həm də gümüş medal qazanıb. Patimat Baqomedova ilə (51 kq) Sona Əhmədli (59 kq) isə sadəcə bürünc medalla kifayətlənib.
