15 sentyabr 2011 22:48
Sona Əhmədli də medal qazandı (YENİLƏNİB)
Türkiyənin İstanbul şəhərində güləş üzrə dünya çempionatı davam edir. Azerisport.az xəbər verir ki, yarışların dördüncü günündə daha 3 güləşçimiz medal və London olimpiadasına lisenziya qazanmağa çalışıb.
55 kq-da yarışan Yuliya Ratkeviç startda Salamat Kuçimova (Özbəkistan) ilə qarşılaşıb və qələbə qazanıb - 1:0, 4:0. Növbəti görüşdə latviyalı Anastasiya Qriqoryevaya da eyni aqibəti yaşatmaq lazım idi ki, idmançımız bunu bacarıb - 6:0, 4:4. 1/4 finalda idmançımızı Kanada güləşçisi Linn Verbek gözləyirdi. Onu da yenəcəyi halda, Ratkeviç də olimpiya lisenziyasına sahib çıxacaqdı. Amma təəsfüf ki, Yuliya bu dəfə məğlubiyyətə üzülüb - 2:1, 0:1, 0:3. Lakin onun hələ də həm lisenziya, həm də medal qazanmaq şansı var. Çünki Verbek finala kimi irəliləyə bilib. Yuliya isə öncə Mariya Qurova (Rusiya) üzərində qələbə qazanmalıydı. Lakin o, 0:2, 1:0, 1:2 uduzaraq, mübarizəsini dayandırmalı olub.
Sona Əhmədli (təşkilatçılar onun soyadını öncədən Əliyeva gösərsələr də, sonradan bu səhvi aradan qaldırdılar - azerisport.az) isə (59 kq) ilk qələbəsini Qazaxıstan güləşçisi Olqa Kalinina üzərində qazanıb - 1:0, 2:0. Onun növbəti rəqibi rusiyalı Valeriya Jolobovaydı. Sona bu rəqibini də çətinliklə də olsa, yenə bilib - 0:2, 2:1, 2:1. Nəticədə, Əhmədli 1/4 finala çıxıb ki, burda da Nadza Mixalkova (Belarus) üzərində qələbəyə sevinib - 3:1, 3:2. İdmançımız yarimfinala çıxsa da, qeyd edək ki, bu yaş qrupunda olimpiadaya lisenziya yoxdu. 1/2 finaldakı rəqib Qana Vasilekoydu (Ukrayna) ki, Əhmədli bu görüşdə məğlub olub - 4:6. Belədə o, axşam keçiriləcək həlledici oyunlarda bürünc medal üçün mübarizə aparacaq. Rəqib isə Kanada güləşçisi Amanda Gerhart olub. Sona bu görüşdə qələbə qazanıb - 1:0, 2:1. Beləcə, o, yığmamızın hesabına daha bir medal yazdırıb.
Gözəl Zutova (63 кг) ilk duelində Mustafa Useynlə (Bolqarıstan) qarşılaşıb və elə startdaca uduzub. Ona qalib gələn rəqibi finala çıxa bilmədiyindən, Zutovanın medal qazanmaq ümidləri də puç olub.
Qeyd edək ki, ilk 3 gündə mübarizə aparan 9 idmançımızdan Rövşən Bayramov (55 kq) qızıl medal və lisenziya qazanıb. 84 kq-da yarışan Saman Təhmasibi London olimpiadasına sadəcə lisenziya əldə etməsinə sevinib. 48 kq-da yarışan Mariya Stadnik həm lisenziya, həm də gümüş medal qazanıb. Patimat Baqomedova isə (51 kq) isə sadəcə bürünc medalla kifayətlənib.
