15 avqust 2011 12:15
Azərbaycan Avropa ikincisi oldu
Polşanın paytaxtı Varşavada güləş üzrə yeniyetmələrin Avropa çempionatı başa çatıb. Azerisport.az xəbər verir ki, avqustun 13-14-də yeniyetmə yunan-Roma güləşçiləri mübarizəyə qoşulub.
Güləşçilərimiz 4 qızıl və 3 bürünc medal qazanaraq 65 xal toplayıb və komanda hesabında ikinci yeri tutub. Rusiya 69 xalla birinci, Gürcüstan 62 xalla üçüncü olub.
42 kq çəkidə Ramiz Məmmədov türk və alman güləşçilərə qalib gəlib, yarımfinalda Rusiyalı güləşçiyə uduzub və bürünc medal görüşünə çıxıb. Üçüncülük uğrunda gərgin keçən görüşdə erməni rəqibindən üstün olan Ramiz bürünc medala sahib olub.
46 kq çəki dərəcəsində Kərim Cəfərov bütün rəqiblərindən üstün olub və qızıl medal qazanıb. Finala qədər təmsilçimiz ardıcıl olaraq Türkiyə, Ukrayna və Moldovadan olan rəqiblərinə qalib gəlib. Finalda erməni təmsilçisi ilə qarşılaşan Kərim rəqibinə heç bir şans verməyib.
50 kq-da mübarizə aparan Sinqapur Olimpiya Oyunlarının qalibi Murad Bazarov komandamıza növbəti qızıl medalı qazandırıb. Ardıcıl olaraq Belarus, Rusiya, Moldova və erməni təmsilçiləri üzərində qələbə güləşçimizi finala çıxarıb. Finalda Türkiyəli rəqibinə də qalib gələn Murad Bazarov Avropa çempionu adını qazanıb.
54 kq çəki dərəcəsində Murad Məmmədov da qızıl medalı finalda erməni rəqibini sıradan çıxarmaqla qazanıb. Finala qədər isə, o, Xorvatiya, Rusiya və Latviyadan olan güləşçilərə qalib gəlib.
58 kq çəkidə Sinqapur Olimpiya Oyunlarının daha bir qalibi Elman Muxtarov mübarizə aparıb və Avropa çempionu adını qazanıb. Bu zaman Elman Macarıstan, Moldova, Almaniya, Gürcüstan və Türkiyədən olan rəqiblərindən üstün olub.
69 kq çəkidə Hacımurad Bağmanov və 100 kq çəkidə mübarizə aparan Hacımurad Çöpsiyev isə komandamıza bürünc medal qazandırıblar.
Yunan-Roma güləşi üzrə yeniyetmələrdən ibarət yığma komandamıza Avropa çempionatında böyük məşqçilər Zöhrab Abbasov və Rasim Ağayev, məşqçi İslam Cəfərov rəhbərlik edib.
