12 avqust 2011 13:01
Azərbaycan AÇ-də daha 2 medala sevindi
Polşanın paytaxtı Varşavada güləş üzrə yeniyetmələrin Avropa çempionatı davam edir. Azerisport.az xəbər verir ki, avqustun 11-də yeniyetmə qızlar mübarizəyə qoşulub. Qızlarımız 1 gümüş və 1 bürünc medal qazanıb.
65 kq-da Raqneta Qurbanzadə finala qədər maneəsiz irəliləyib. Bu zaman Ukrayna və Polşadan olan rəqiblərini mübarizədən kənarlaşdırıb. Finalda İsveç təmsilçisi ilə gərgin keçən görüşdə uduzaraq gümüş medalla kifayətlənib.
38 kq çəkidə mübarizə aparan Sahilə Ələkbərova ¼ finalda Belarus təmsilçisinə qalib gəlsə də yarımfinalda Rusiya güləşçisinə uduzub. Bolqarıstan güləşçisi ilə görüşdən qalib ayrılan Sahilə bürünc medala sahib olub.
49 kq-da təmsilçimiz Şəfəq Muradzadə Avstriya və Polşa güləşçilərini məğlub edib, yarımfinalda Moldova təmsilçisinə uduzaraq bürünc medal şansı əldə edib. Almaniyadan olan rəqibi qarşısında üstün ola bilməyən təmsilçimiz çempionatı 5-ci sırada tamamlayıb.
Yeniyetmə qızların yarışında Sahilə Ələkbərova (38 kq), Şəfəq Muradzadə (49 kq), Solmaz Həşimzadə (52 kq) və Raqneta Qurbanzadə (65 kq) mübarizə aparır. Komandaya məşqçilər Arif Fərmanov, İsaməddin Hüseynov və Mətanət Süleymanova rəhbərlik edir.
Avropa çempionatında bu gün digər çəkilərdə yeniyetmə qızlar mübarizə aparacaq. Bugünkü görüşlərdə ölkəmizi yalnız 52 kq çəki dərəcəsində Solmaz Həşimzadə təmsil edəcək.
Yunan-Roma güləşi üzrə yeniyetmələrdən ibarət yığma komandamız Avropa çempionatının son günlərində mübarizəyə qoşulacaq. Böyük məşqçilər Zöhrab Abbasov və Rasim Ağayev, məşqçi İslam Cəfərovun rəhbərliyi altında çempionatda Ramiz Məmmədov (42 kq), Kərim Cəfərov (46 kq), Murad Bazarov (50 kq), Murad Məmmədov (54 kq), Elman Muxtarov (58 kq), Emil Abdullayev (63 kq), Hacımurad Bağmanov (69 kq), Sərxan Cahangirli (76 kq), Türmən Eyyubov (85 kq) və Hacımurad Çöpsiyev (100 kq) iştirak edəcək.
