11 avqust 2011 11:47
Azərbaycan Avropa birincisi oldu
Polşanın paytaxtı Varşavada güləş üzrə yeniyetmələrin Avropa çempionatı keçirilir. Azerisport.az xəbər verir ki, turnirin ikinci günündə sərbəst güləş yığmamızın üzvləri 1 qızıl, 3 gümüş və 1 bürünc medal qazanmaqla Avropa çempionatında yeni tarix yazıblar.
Xatırladaq ki, yeniyetmə sərbəst güləşçilərimiz çempionatın ilk günündə 2 qızıl və 2 bürünc medal qazanmışdı. Ümumilikdə, 3 qızıl, 3 gümüş və 3 bürünc medal qazanan yığmamız 81 xal toplamaqla, komanda hesabında Avropa çempionatının ən güclüsü olub. 2-ci yeri 69 xalla Rusiya, 3-cü yeri isə 68 xalla Ukrayna tutub.
Çempionatın ikinci günündə mübarizəyə qoşulan 5 sərbəst güləşçimizdən 4-ü finala qədər maneəsiz irəliləyib.
Final görüşündə Almaniya təmsilçisindən üstün olan Ruslan Qasımov (46 kq) komandamıza növbəti qızıl medalı qazandırıb. Buna qədər isə o, ardıcıl olaraq Litva, Polşa və Rusiya güləşçilərini məğlub edib.
Finala yüksələn Pərviz İbrahimov (54 kq) Belarus, İtaliya və Gürcüstan güləşçilərini üstələsə də, finalda Ukrayna təmsilçisinə uduzub və gümüş medalla kifayətlənib.
Ardıcıl olaraq Litva, Ukrayna və Belarus güləşçilərinə qalib gələn Orxan Şərifov (76 kq) finalda Türkiyə təmsilçisinə məğlub olub və gümüş medala sahib olub.
Ağır çəkidə təmsilçimiz Ruslan Hacıyev (100 kq) Rusiya, Polşa və Türkiyədən olan rəqiblərini üstələsə də finalda gürcü güləşçi ilə bacarmayıb və gümüş medalla kifayətlənib.
63 kq çəkidə mübarizə aparan Hacımurad Ömərov ilk görüşdə erməni təmsilçisini tam üstünlüklə məğlub edib. Fransa və Ukrayna güləşçilərini də üstələyən Hacımurad, yarımfinalda gürcü təmsilçisi ilə gərgin keçən görüşdə uduzaraq bürünc medal şansı əldə edib. İsrail təmsilçisi ilə bu görüşü də qələbə ilə başa vuran güləşçimiz Avropa çempionatının bürünc medalına sahib olub.
Xatırladaq ki, ilk gün mübarizəyə qoşulan 5 təmsilçimizdən 4-ü medal qazanmışdı. Elçin Məmmədov (58 kq) və Pərviz Axundov (85 kq) qızıl, Məmmədhüseyn Həsənov (50 kq) və Şamil Sadullayev (69 kq) bürünc medala yiyələnməklə komandamızın Avropanın ən güclüsü olmasında böyük pay sahibi olublar.
Sərbəst güləş yarışlarında ölkəmizi komandanın böyük məşqçiləri Vahid Məmmədov və Siracuddin Eldarov, məşqçi Əsgərxan Novruzovun rəhbərliyi altında iştirak edib. Bu gün isə, Avropa çempionatında yeniyetmə qızlar mübarizəyə qoşulur.
