27 iyul 2011 23:42
Azərbaycan DÇ-də iki bürünc medala sevindi (YENİLƏNİB)
Rumıniyanın paytaxtı Buxarestdə gənc güləşçilərin dünya çempionatı davam edir. Azerisport.az xəbər verir ki, yarışın ikinci günündə daha 4 yunan-roma güləşçimiz döşək üzərinə çıxıb.
55 kq-da mübarizə aparan Eldəniz Əzizli startda qırğızıstanlı Eldiar Beqaliyevi mübarizədən kənarlaşdırmağı bacarıb. Növbəti mərhələdə o, iranli Samad Muran Abduli ilə dueldən qalib ayrılmalıydı. Lakin təəssüf ki, qonşu ölkə güləşçisi daha güclü çıxıb. Buna baxmayaraq, Əzizli bürünc medal şansını saxlayıb. O, bu yolda Mişa Avetisyan (Ukrayna), Çanq-Yonq Li (Koreya), Nurilbek Muxanbetalin (Qazaxıstan) üzərindəki qələbə qazanıb. Nəticədə idmançımız bürünc medala sahib çıxıb.
66 kq çəkidə yarışan Rəsul Çunayev özbəkistanlı Sərdar Karyağdıyevlə mübarizəyə start verib. Bu rəqibini mübarizədən kənarlaşdıran təmsilçimizi ukraynalı Dmitri Pinkova da eyni aqibəti yaşadıb. Lakin 1/4 finalda rusiyalı Çingiz Labazanovla duel həmyerlimiz üçün uğursuz bitib. Amma Çunayevin bürünc medal qazanmaq şansı qalır. Bunun üçün o, öncə koreyalı Yon Tak Yu üzərində qələbə qazanmalıydı ki, bunu bacarıb. Son cəhddə isə Belarus güləşçisi Yaraslav Kardaşa da eyni aqibəti yaşatmaqla bürünc medalı özü üçün təmin edib.
Fuad Əliyev (84 kq) ilk olaraq rusiyalı Mahmud Başiyevi döşək üzərindən məğlub yola salmalı olsa da, elə startdaca uduzaraq, mübarizəni dayandırıb.
Aslan Cəbişov (120 kq) isə startda qazaxıstanlı Dəmir Kuzembayevə qalib gəlməyi bacarıb. O, növbəti mərhələdəki rəqib rusiyalı Vasili Parşin üzərində də qələbə qazanıb. Lakin yarımfinalda Şora Qoqişvanidze idmançımız üçün keçilməz olub. Buna baxmayaraq, onun bürünc medal qazanmaq şans vardı. Cəbişov ukraynalı İqor Didiki məğlub edəcəyi halda, medal qazana bilərdi. Gəl ki, idmançımız bu şansından da yararlana bilməyib.
Xatırladaq ki, yarışın ilk günündə 4 yunan-roma güləşçimizdən sadəcə Vilayət Qəhrəmanlı (50 kq) komandamıza qızıl medal qazandıra bilmişdi.
