22 iyun 2011 13:12
Avropa çempionatının ilk günündə bir dəst medal
Serbiyanın Zrenyanin şəhərində gənclər arasında güləş üzrə Avropa çempionatı keçirilir. Azerisport.az xəbər verir ki, çempionatın proqramına əsasən, ilk gün 50, 60, 74 və 96 kq çəkidə sərbəst güləşçilər mübarizə aparıblar. Yığmamız ilk gündə bir dəst medal – 1 qızıl, 1 gümüş və 1 bürünc qazanıb.
50 kq çəkidə Mircəlal Həsənzadə 1/4 finaldan mübarizəyə başlayıb və Rumıniya təmsilçisi ilə görüşdən (5:0, 7:0) qalib ayrılıb. Yarımfinalda Rusiya təmsilçisi Aldar Baljinimayevlə gərgin keçən görüşdə (2:4, 1:3) uduzaraq, bürünc medal qazanmaq şansı əldə edib. Belarus idmançısı Mahsad Hasandu ilə görüşdən inamlı qələbə (3:0, 3:1) ilə ayrılan Mircəlal yığmamıza ilk medalı qazandırıb.
60 kq çəkidə Hacı Əliyev 1/8 finaldan mübarizəyə qoşulub və ilk olaraq macar Jozef Molnarı (3:0, 7:0), daha sonra gürcü Tengiz Çoçişvilini (1:0, 1:0), yarımfinalda rusiyalı Abdurahman Bagamaevi (1:0, 2:1) məğlub edərək finala yüksəlib. Finalda Türkiyə təmsiçisi Ömer Uzanla gərgin keçən görüşdə uduzaraq (0:1, 2:0, 0:1) gümüş medala sahib olub.
96 kq çəkidə Aslanbek Alborov da 1/8 finaldan mübarizəyə başlayıb və ardıcıl olaraq yunan Asigritos Mourantis (1:0, 1:2, 1:0), belarus Vladimir Çartkoyev (2:1, 1:1), ukraynalı Hleb Kutey (2:0, 1:1) üzərində qələbə qazanaraq finala yüksəlib. Finalda Rusiya təmsilçisi Batraz Qazzayevlə görüşdən (1:0, 3:2) qalib ayrılan Aslanbek Alborov, komandamıza qızıl medal qazandırıb.
55, 66, 84 və 120 kq çəkidə sərbəst güləşçilər isə iyunun 22-də mübarizə qoşulacaq, artıq ilk rəqiblər bəllidir:
55 kq – Qalib Əliyev – Veliko Lyutzkanov (BUL)
66 kq – Məhəmməd Müslümov – Georg Marchl (AUT)
84 kq – İlya Xamikoyev – Albert Tsipinov (RUS)
120 kq – Aslan Dzebişov – Richard Csercsics (HUN)
Qızlardan ibarət yığma komandamız 23-24 iyunda, yunan-Roma güləşçiləri isə çempionatın son iki günündə xalça üzərinə çıxacaq.
