7 aprel 2011 12:06
Elçin Cəfərov: Komanda hesabında birinci ola bilərdik
Almaniyanın Dortmund şəhərində keçirilən Avropa çempionatında 1 qızıl və 4 bürünc medal qazanmaqla komanda hesabında 2-ci yeri tutmuş yunan-roma güləşi üzrə yığmamız vətənə dönüb. Azerisport.az xəbər verir ki, Heydər Əliyev adına Beynəlxalq Hava Limanında güləşçilərimizi qarşılayanlar arasında media nümayəndələri də var idi.
Azərbaycan Güləş Federasiyasının yunan-roma güləşi üzrə vitse-prezidenti Elçin Cəfərov idmançılarımızın çıxışlarını yüksək qiymətləndirib: “Hər şeydən öncə onu deyim ki, yunan-roma yığmamız Avropa çempionatları tarixində ilk dəfə olaraq komanda hesabında 2-ci yeri tutdu ki, bu da bizi çox sevindirir. Biz 1-ci olan Rusiyadan cəmi 2 xal geri qaldıq. Əgər 84 və 120 kq çəkilərdəki təmsilçilərimiz də bir qədər uğurla çıxış etsəydilər, biz komanda hesabında 1-ci ola bilərdik. Çempionumuz Rafiq Hüseynov, eləcə də bürünc medalçılar - 55 kq-da gənc Eldəniz Əzizli və 96-da Şalva Qadabadze də özlərini yaxşı tərəfdən göstərdilər. Əldə etidyimiz nailiyyətlər federasiyamızın, eləcə də Milli Olimpiya Komitəsi və Gənclər və İdman nazirliyinin öz işlərini düzgün qurmasının nəticəsidi”.
