4 aprel 2011 14:54
Qadın pəhləvanlarımız Bakıya döndü
Almaniyanın Dortmund şəhərində keçirilmiş Avropa çempionatında çıxışını başa vurmuş qadın güləşçilərdən ibarət yığmamız vətənə dönüb. Azerisport.az xəbər verir ki, onları Heydər Əliyev adına Beynəlxalq Hava Limanında idman ictimaiyyəti və mətbuat nümayəndələri qarşılayıblar.
Qeyd edək ki, 3 qızıl və 1 bürünc medalla yığmamız Avropa çempionatını 2-ci yerdə tamamlayıb. Pəhləvanlarımızın və məşqçilərimizin qitənin ən güclülərinin yarışması ilə bağlı fikirləri belə olub:
Nadejda Sementsova (2-qat Avropa çempionu): “Qələbə qazanmaq elə də asan olmadı. Sadəcə, hazırlığımız mənim arzumu realalşdırmağa imkan yaratdı. Qarşıda milli komandanı daha ciddi sınaqlar gözləyir. Orada da özümü doğrultmağa çalışacam”.
Mariya Stadnik (3-qat Avropa çempionu): “Analıq məzuniyyətinə çıxdığım üçün, xeyli müddət məşq etməmişdim. Bu səbəbdən fiziki göstəricilərimdə cüzi çatışmazlıqlar vardı. Elə bil ilk dəfə idi ki, xalça üzərinə çıxırdım. Bunları yarışın gedişində aradan qaldırdım. İlk görüşlərdən sonra özüməinanım qayıtdı və sonrakı qarşılaşmalarda özümü rahat hiss etdim. 3-cü dəfə qitə çempionu olduğuma çox sevinirəm”.
Yuliya Ratkeviç (Avropa çempionu): “Yarışqabağı məndə müəyyən gərginlik vardı. Axı, uzun müddət idi Avropa çempionatında mükafat qazanmamışdım. Lakin italiyalı rəqibimlə ilk görüşdən sonra həyəcan aradan qalxdı və hər şey yoluna düşdü. Yekunda fəxri kürsünün ən yüksək pilləsinə qalxdım”.
Olesya Zamula (Avropa çempionatının bürünc mükafatçısı): «Mükafat qazandığım üçün sevincim hədsizdi. Açığı, bu anı çox gözləmişəm. Əvvəlki mötəbər yarışlarda medalı sonda əldən buraxırdım. İndi həmin uğursuzluğa son qoymağıma sevinirəm. Növbəti turnirlərdə də qələbənin davamını gətirməyə səy göstərəcəm”.
