1 aprel 2011 15:26
Yığmamızın baş məşqçisi iki qızıl medaldan narazıdı
Almaniyanın Dortmund şəhərində keçirilən güləş üzrə Avropa çempionatında çıxışını başa vurmuş sərbəst güləş üzrə yığma komandamızın vətənə döndüyünü xəbər vermişdik. Azerisport.az xəbər verir ki, komandamızın baş məşqçisi, olimpiya, dünya və Avropa çempionu Saypulla Absaidov güləşçilərimizin çıxışını dəyərləndirərkən bildirib ki, ümumi nəticədən razıdı.
Amma o bəzi çəkilərdəki idmançılardan daha yüksək nailliyyət gözlədiyini də gizlətməyib: “Biz ən azı ötənilki nəticəmizi təkrarlamağı, yəni 3 qızıl medal götürməyi planlaşdırmışdıq. Amma bəzi səhvlər 3-cü qızıl medalı qazanmağa imkan vermədi. Səhvləri müəyyənləşdirmişik və təbii ki onların aradan qaldırılması üzərində işləyəcəyik. 60 kq-la bağlı elə də böyük narahatlıq keçirmirik. Bu çəkidə Zəlimxan Hüseynov kimi təcrübəli güləşçimiz var. Medal qazana bilməsə belə gənc Toğrul Əsgərov da daim dəqqətimizdə olacaq. 74 kq-da da medalsız qaldıq və bu çəki ilə bağlı da qarşıdakı aylarda planlarımızı həyata keçirməyə çalışacağıq. İyulda Bakıda ümummilli lider Heydər Əliyevin xatirəsinə həsr olunmuş Qızıl Qran-Pri turnirinin final mərhələsi keçiriləcək və bu yarışa qədər 74 kq-da gənc İbrahim Yusubovun üzərində xüsusi işləyəcəyik. Hər halda Qızıl Qran-Pri turnirinin final mərhələsi bizim üçün İstandulda keçiriləcək lisenziya xarakterli dünya çempionatı üçün son hazırlıq mərhələsi olacaq və 99% heyətimiz məhz iyulda müəyyənləşəcək”.
Yığma komandanın böyük məşqçisi Firdovsi Umudov isə Mahaçqalada keçirilən Dünya Kuboku ilə Dortmunddakı Avropa çempionatı arasında cəmi 1 həftə vaxt olduğundan hazırlıq planlarını da məhz buna əsasən qurduqlarını deyib: “İşlərimizi elə qurmuşduk ki, güləşçilərin psixoloji, fiziki və taktiki plandan çatışmazlıqları olmasın. Düşünürəm ki Avropa çempionatında əldə etdiyimiz nəticələr qənaətbəxşdi”.
Xatırladaq ki, sərbəst güləşçilərimizdən 66 kq-da yarışan Cəbrayıl Həsənov ardıcıl 2-ci, 96 kq-da çıxış edən Xetaq Qazyumov isə dalbadal 3-cü dəfə Avropanın ən güclüsü adını qazanıb. Yığma komandamızın digər üzvlərindən 55 kq-da Mahmud Məhəmmədov, 84-də Şərif Şərifov və 120 kq çəkidə Cəmaləddin Məhəmmədov Avropa çempionatının bürünc medalını əldə ediblər. Komanda hesabında Azərbaycan Rusiya yığmasından sonra 2-ci nəticə göstərib.
