1 aprel 2011 15:06
Avropa çempionlarımız vətənə döndü
Almaniyanın Dortmund şəhərində keçirilən güləş üzrə Avropa çempionatında çıxışını başa vurmuş sərbəst güləş üzrə yığma komandamız vətənə dönüb. Azerisport.az xəbər verir ki, Heydər Əliyev adına Beynəlxalq Hava Limanında komanda üzvlərini mətbuat nümayəndələri və güləş həvəskarları böyük çoşqu ilə qarşılayıblar.
Xatırladaq ki, sərbəst güləşçilərimizdən 66 kq-da yarışan Cəbrayıl Həsənov ardıcıl 2-ci, 96 kq-da çıxış edən Xetaq Qazyumov isə dalbadal 3-cü dəfə Avropanın ən güclüsü adını qazanıb.
Pəhləvanlarımız Avropa çempionatı ilə bağlı fikirlərini də açıqlayıblar.
Cəbrayıl Həsənov: “Almaniyaya çempion olmaq üçün yollanmışdım və çox sevinirəm ki qarşıya qoyulan məqsədə nail oldum. İndi əsas məqsədim qarşıdakı turnirlərdə və ən əsası sentyabrda İstanbulda keçiriləcək lisenziya xarakterli dünya çempionatında uğurla çıxış edərək London yay olimpiya oyunlarına vəsiqə qazanmaqdı”.
Xetaq Qazyumov: “Finaldakı rəqibim gənc olmasına rəğmən çox təhlükəli idi. Bu səbəbdən də rusiyalı güləşçi ilə qarşılaşmamı digərlərinə nisbətən daha çətin sayıram. Nə deyə bilərəm? 3 qat Avropa çempionu olduğum üçün çox xoşbəxtəm”.
Xatırladaq ki yığma komandamızın digər üzvlərindən 55 kq-da Mahmud Məhəmmədov, 84-də Şərif Şərifov və 120 kq çəkidə Cəmaləddin Məhəmmədov Avropa çempionatının bürünc medalını əldə ediblər. Komanda hesabında Azərbaycan Rusiya yığmasından sonra 2-ci nəticə göstərib.
