9 fevral 2011 13:44
İstanbula 20 idmançıyla
11-13 fevral 2011-ci il tarixdə Türkiyənin İstanbul şəhərində “Yaşar Doğu” beynəlxalq güləş turniri keçiriləcək. Azerisport.az xəbər verir ki, 39-cu dəfə keçirilən turnirdə böyüklərdən ibarət sərbəst və qadın güləşi üzrə yığma komandalarımız da iştirak edəcək.
Sərbəst güləş üzrə yarışlarda ölkəmizi Yaşar Əliyev (55 kq), Mahmud Məhəmmədov, Toğrul Əsgərov (hər ikisi 60 kq), Zəlimxan Hüseynov (66 kq), Cəbrayıl Həsənov, Aleksandr Qostiyev (hər ikisi 74 kq), Novruz Temrezov (84 kq), Xetaq Qazyumov, Şərif Şərifov (hər ikisi 96 kq) və Əli İsayev (120 kq) təmsil edəcək. Komandamız turnirdə baş məşqçi Saypulla Absaidov, böyük məşqçi Firdovsi Umudov, məşqçi Aslan Ağayevin rəhbərliyi altında iştirak edəcək.
Qadınların yarışında Mariya Stadnik, Marziget Baqomedova (hər ikisi 48 kq), Patimat Baqomedova, Anjela Doroqan (hər ikisi 51 kq), Yuliya Ratkeviç, Yarina Dubrovska (hər ikisi 55 kq), Olesya Zamula, Gözəl Zutova (hər ikisi 63 kq), Nadya Sementsova, Natalya Palamarçuk (hər ikisi 72 kq) ölkəmizi təmsil edəcək. Yığma komandamıza turnirdə böyük məşqçi Kurban Kurbanov başçılıq edəcək.
Beynəlxalq dərəcəli hakim Zakir Məmmədov görüşlərin idarə edilməsində iştirak edəcək.
