21 iyul 2010 00:37
Gənclərimiz Dünya birinciliyində iştirak edəcək
Iyulun 20-25-də Macarıstanın paytaxtı Budapeştdə gənclər arasında sərbəst, qadın və yunan-roma güləşi üzrə Dünya birinciliyi keçiriləcək. Azerisport.az Azərbaycan Güləş Federasiyasının rəsmi saytına istinadən xəbər verir ki, hər üç növ üzrə Azərbaycan yığma komandası turnirdə iştirak edəcək.
İyulun 20-21-də yunan-Roma güləşçiləri, iyulun 22-23-də qadın güləşçilər, 24-25 iyulda isə sərbəst güləşçilər mübarizə aparacaq.
Yunan-Roma güləşi üzrə yığma komandamızın heyətində Eldəniz Əzizli (50 kq), Qasım Məhəmmədov (55 kq), Kamran Məmmədov (60 kq), Rəsul Cunayev (66 kq), Toğrul Yunuslu (74 kq), Şəhriyar Məmmədov (84 kq), Zaur Mehrəliyev (120 kq) yer alıb. Komandamız turnirə böyük məşqçi Ağalar Aslanov və Zöhrab Abbasovun başçılığı altında yollanıb.
Böyük məşqçi Kurban Kurbanovun başçılığı ilə turnirə yola düşən qadın güləşi üzrə yığmamızı Marziget Baqomedova (44 kq), Fatma Əhmədova (51 kq), Günay İsmayılova (55 kq) və Katerina Dombrovskaya (59 kq) təmsil edəcək.
Sərbəst güləş üzrə yığma komandamız böyük məşqçi Arif Abdullayev və məşqçi Elman Əsgərovun başçılığı altında Dünya birinciliyində iştirak edəcək. Heyətdə Nicat Muradov (50 kq), Toğrul Əsgərov (55 kq), Ümid Məmmədov (60 kq), David Suynuçxanov (66 kq), İbrahim Yusubov (74 kq), İlya Xamikoyev (84 kq), Aslanbek Alborov (96 kq) və Aslan Dzebisov yer alıb.
Görüşlərin idarə edilməsində ölkəmizi AGF Hakimlər Kollegiyasının sədri Əjdər Cəfərov, beynəlxalq dərəcəli hakimlər Qərib Əliyev və Fərəqət Cəlalov təmsil edəcək.
