Bu da fiasko: 6 döyüş, 6 məğlubiyyət (YENİLƏNDİ)
Bakıda keçirilən Avropa çempionatının son günündə döşək üzərinə çıxacaq Azərbaycanın yunan-Roma güləşçilərinin ilk rəqibləri məlumdur. Azerisport.az xəbər verir ki, Şalva Qadabadze (84 kq) ilk döyüşündə Nəzmi Avluca (Türkiyə), Səbuhi Hümbətov (96 kq) Aslanbek Huştov (Rusiya), Müslüm Müslümov (120 kq) isə Radomir Petkoviçlə (Serbiya) güləşəcək.
***
Bu gün döşək üzərinə çıxan ilk "klassiki"imiz - Şalva Qadabadze debüt görüşündəcə məğlubiyyətə uğrayıb. İndi təmsilçimiz Nəzmi Avlucanın finala çıxmasını gözləməlidir. Çünki yalnız bu halda Qadabadze "bürünc" uğrunda mübarizəyə qoşula bilər.
Təəssüflər olsun ki, digər güləşçilərimiz də ilk görüşlərini məğlubiyyətlə başa vurdular. Səbuhi Hümbətov Aslanbek Huştova, Müslüm Müslümov isə Radomir Petkoviçə yenildi. İndi komandamız maksimum bürünc medallar uğrunda mübarizə apara bilər.
***
Avluca ilə Petkoviçin finala adlaması müvafiq olaraq, onlara yenilən Qadabadze ilə Müslümova bürünc medal uğrunda mübarizə aparmaq şansı verəcək. İndi digər pəhləvanımız Səbuhi Hümbətov Aslanbek Huştovun mübarizəsini izləyir.
"Klassik"lərimizin uğursuz çıxışı davam edir. Təəssüflər olsun ki, təsəlliverici görüşlər də Müslüm Müslümov və Şalva Qadabadze üçün uğurlu olmayıb. Onlar müvafiq olaraq, Vladimir Quralski (İsrail) və Nenad Zuraj (Xorvatiya) ilə görüşlərdən məğlub çıxaraq, AÇ-də mübarizəni dayandırıblar. İndi yeganə ümid Səbuhi Hümbətovadır.
Azərbaycan AÇ-də mübarizəni vaxtından əvvəl dayandırdı. Birinci təsəlliverici görüşdə gürcüstanlı Soso Cebidzeyə yenilən Hümbətov da "bürünc" şanslarını itirdi.
Beləliklə, yarışıların üçüncü günündə döşək üzərinə çıxan hər üç Azərbaycan güləşçisi üst-üstə keçirdikləri 6 görüşün hamısına məğlub oldular.
Həlledici döyüşlər axşam saatlarında keçiriləcək.
