Tarixə qovuşan AÇ: suallar və cavablar

Paytaxtımızda daha bir mötəbər turnir tarixə qovuşdu. Yavaş-yavaş idman şəhərinə çevrilən Bakı daha bir Avropa çempionatını – bu dəfə güləş üzrə qitə birinciliyini uğurla yola verdi.

Azerisport.az xəbər verir ki, Azərbaycanı yalnız AÇ-nin son günü təəssüfləndirdi. Böyük ümidlər bəslənən Şalva Qadabadze, Səbuhi Hümbətov və Müslüm Müslümovun bir neçə saat ərzində birlikdə düz 6 dəfə (!) məğlub olması iki ən qədim sualını yenidən gündəmə gətirdi: “kimdir günahkar?” və “nə edək?”

Ruslar bu sualı özlərinə aid edirlər, amma unudurlar ki, uğursuzluğa düçar olmaq və çarəsiz qalmaq tək bu xalqa mənsub olan “keyfiyyətlər” deyil. AÇ düşünmək üçün bir neçə məhsul versə də, bu gün Azərbaycan üçün həmişə problemli olan ağır çəki dərəcələrində mübarizə aparan idmançıların rəqabətədavamlı olmaması barədə danışmaq istəmirik. Çünki turnirdə gənc və istedadlı azərbaycanlı güləşçilərin parlaq qələbələri, zədəli-zədəli iki rəqibini devirən Fərid Mansurov qəhrəmanlıq göstərdiyi anlar oldu. Bütün bunların fonunda həm sərbəst, həm də yunan-Roma güləşində ən ağır çəkidəki təmsilçilərimizin uğursuzlaqlarından söz açmağa heç həvəs yoxdur. Onsuz da bu, güləşimiz ən zəif nöqtəsidir və təcrübə göstərir ki, heç milliləşdirmə də problemləri həll edəcək gücdə deyil.

Yeri gəlmişkən, milliləşdirmə barədə. 6 günlük mübarizə “milliləşdirməyə davam edəkmi, yoxsa yox” sualına da tutarlı cavab verə bilmədi. Bir yanda yarışdan az əvvəl Azərbaycan yığmasının şərəfini qorumağa razılıq verən Mahmud Maqomedovun qələbəsi, digər yanda Şalva Qadanadzenin biabırçı çıxışı. Bir yanda Xetaq Qazyumovun ardıcıl ikinci AÇ “qızıl”ı, digər yanda istedadı dillər əzbəri olan Çamsulvara Çamsulvarayevin yenə “yalnız” bürünc medalla kifayətlənməsi. Bir yanda Nadya Sementsovanın “Avropa güləşinin kraliçası”na çevrilməsi, digər yanda üç milliləşdirilmiş xanım pəhləvanın uğursuzluqları...

Qoy, bu suala Azərbaycanda güləşin inkişafına cavabdeh olan şəxslər cavab versin. Amma bu sətirlərin müəllifinin şəxsi fikrini bilmək istəyirsinizsə, tarixindən Xəzər İsayev, Məhyəddin Allahverdiyev, Namiq Abdullayev və Fərid Mansurov kimi güləşçilər keçmiş Azərbaycan kimi ölkənin yığmasının şərəfini öz istedadlı uşaqları qorumalıdır. Güləşin Azərbaycanda nə dərəcədə məşhur olmasını bir daha görmək üçün uzağa getməyin, elə sol tərəfdəki sorğunun nəticələrinə baxın və bilin ki, bu ölkədə futboldan başqa hansı idman növü insanlarda daha çox maraq oyadır.

Əlbəttə, kəmiyyət hələ keyfiyyət demək deyil, amma düzgün və sistemli iş bir yox, onlarla yeni fərid mansurovların, namiq abdullayevlərin yetişməsinə şərait yarada bilər. Bu AÇ-nin Azərbaycanda güləşin, ümumiyyətlə, idmanın inkişafına yeni təkan verməsi arzusu ilə!..

Unutmayaq ki, idman tək xarici ölkələrdə bayrağımızın qalxması, dövlətimizin nüfuzunun artması üçün deyil. İdman övladlarımızın və hər birimizin sağlam böyüməsi və sağlam yaşaması üçün vacibdir.