Qızılla başladı, qızılla bitdi: Qazyumov ikiqat Avropa çempionudur! (YENİLƏNDİ)

Bu gün güləş üzrə Avropa çempionatının ikinci günüdür. Azerisport.az xəbər verir ki, gün ərzində üç çəki dərəcəsində baş tutacaq mübarizə ilə sərbəst güləş yarışlarına yekun vurulacaq.

 

Döşək üzərinə üç azərbaycanlı pəhləvan çıxacaq. İlk görüşlərdə Hacı Əliyev (60 kq) Tim Şlaygeri (Almaniya), Çamsulvara Çamsulvarayev (74 kq) Gia Çixladzeni (Ukrayna), Xetaq Qazyumov (96 kq) isə İmants Laqodskisi (Latviya) sınağa çəkəcək.

 

Qeyd edək  ki, Çamsulvarayev və Qazyumov 2009-cu ilin Avropa çempionlarıdır.

 

***

 

Yarışın ikinci günündə hər üç pəhləvanımız 1/4 finala adlayıb. Hacı Əliyev Tim Şlaygeri 0:1, 3:0, 2:1, Çamsulvara Çamsulvarayev Gia Çixladzeni 5:1, 2:1, Xetaq Qazyumov isə İmants Laqodskisə 4:0, 4:0 hesabları ilə qalib gəlib.

 

***

 

Yarımfinalda Azərbaycan bir idmançısını müvəqqəti olaraq, itirdi. Hacı Əliyev moldovalı Andrey Perpelitaya məğlub oldu: 4:5, 1:0, 0:4. Rəqibin finala çıxması Əliyevə bürünc medal uğrunda yarışmaq şansı verəcək.

 

Xate Qazyumovla Çamsulvara Çamsulvarayev isə "qızıl" uğrunda yürüşlərini davam etdirirlər. Qazyumov Radoslav Barana (Polşa) heç bir şans vermədi: 7:0, 1:0. Çamsulvarayev isə yunanıstan  pəhləvanı Oleq Motsalin üzərində təmiz qələbə qzandı.

 

***

Xetaq Qazumov Azərbaycana 3-cü qızıl medalı gətirməyə yaxındır. Yarımfinalda Aleksey Debko (Belarus) təmsilçimizə müqavimət göstərə bilməyib: 3:0, 4:0

 

Çamsulvara Çamsulvarayev finalda bolqarıstanlı Kirill Terzievə məğlub olub qızıl medal şansını əldən verdi. Avropa çempionu titulunu itirdi və "bürünc" uğrunda güləşəcək.

 

Hacı Əliyev isə ümumiyyətlə, medalsız qaldı. Buna səbəb onu 1/4 finalda məğılub edən Andrey Perpelitanın finala çıxa bilməməsidir.

 

***

Yarımfinalda yenilən Çamsulvara Çamsulvarayev hər halda, turniri medalsız tərk etmədi. Pəhləvan bürüc medal uğrunda döyüşdə Georq Harta (Almaniya) 2:0 və 2:0 hesabları ilə qalib gəlib. Bu, Azərbaycanın qitə birinciliyində ilk bürünc medalıdır.

 

Sərbəst medal yarışlarını "qızıl"la açan Azərbaycan turniri "qızıl"la da bağladı. Xetaq Qazyumov finalda Gürcüstan təmsilçisi dünya çempionu Georgi Qoşelidzeyə qalib gələrək (2:0, 1:0), karyerasında ikinci dəfə Avropa çempionu oldu.