Fərid Mansurov ermənilərə şans tanımadı

Olimpiya və ikiqat dünya çempionu Fərid Mansurov erməni güləşçilərinin Bakıda keçiriləcək Avropa çempionatında iştirak etmək istəyi ilə bağlı öz fikirlərini bölüşüb. Azerisport.com xəbər verir ki, Mansurov ermənilərin mükafatsız qalacağına əmindir: Onların Bakıya gəlmək istədiyini eşitmişəm. Məncə, əbəs yerə zəhmət çəkirlər – onlar Bakıda sevinə bilməyəcək. 3 il əvvəl də erməni idmançılar Azərbaycanda çox çalışdılar, amma medal qazana bilmədilər. Yeganə bürünc medalı isə milliləşmiş güləşçi Yuri Pertikeyev əldə etdi. Əminəm ki, bu dəfə ümumiyyətlə, mükafatsız qalacaqlar”.

 

Yunan-Roma güləşi üzrə Azərbaycan yığmasının lideri həmçinin Rövşən Bayramov və Roman Amoyan arasındakı rəqabətə toxunub. Xatırladaq ki, Amoyan ötən dünya çempionatında Bayramovu məğlub edib, yaxınlarda isə Ermənistan mətbuatına açıqlamasında Rövşənə bir daha qalib gəlmək istəyində olduğunu bildirib. Mansurov öz növbəsində bunun mümkünsüz olduğunu söylədi: “Fikrimcə, həmin qələbə təsadüfi idi. Rövşən buna qədər Amoyana dörd dəfə qalib gəlib. Şübhə etmirəm ki, ardıcıl on dəfə güləşsələr də, Amoyan həmyerlimizi məğlub edə bilməz. Bakıda da bir daha bunun şahidi olacağıq”