Gimnastika ailəsi bayram tonqalı ətrafına toplaşdı
Novruz Bayramının əsas xüsusiyyəti onun böyük ailələri bayram tonqalı ətrafında və ənənəvi dadlı şirniyyatlar, milli yeməklər və əlbəttə ki, bu bayramın başlıca rəmzi olan Səməni ilə bəzədilmiş bayram süfrəsi arxasında birləşdirməkdən ibarətdir. Azerisport.az xəbər verir ki, “torpaq çərşənbəsi” adlandırılan Novruz Bayramından əvvəlki ilaxır çərşənbə axşamında böyük gimnastika ailəsi doğma evi – Milli Gimnastika Arenasının (MGA) həyətində qalanmış isti tonqal ətrafında toplaşıb.
Tonqal atəşinin hündürlüyünə baxmayaraq, gimnastikanın 6 yarış növü üzrə yığma komandaların üzvləri əsl idmançı ruhunu nümayiş etdirərək sevinclə tonqal üzərindən tullanıblar. İnkişaf edən Azərbaycan gimnastikasının gələcəyi olan balaca uşaqlar isə özlərinə məxsus uşaq cəsarət ilə şənliyə xüsusi gözəllik qatan kiçik tonqalların üzərindən hoppanmaq üçün bir-birini qabaqlamağa çalışıblar.
Ləzzətli şirniyyatlardan dadan şənlik iştirakçıları qədim adətlərə sadiq qalaraq qaynadılmış rəngarəng yumurtaları böyük həvəslə döyüşdürüblər.
Şıltaq mart ayının Bakı küləyi idmançılar, məşqçilər, tibbi heyət, həmçinin Azərbaycan Gimnastikası Federasiyası və MGA-nın əməkdaşları ilə birlikdə Azərbaycanın milli "Yallı" rəqsinin ritminə uyğun eyni vaxtda dövrə vurub.
