Xaqani Məmmədov rüşvət qalmaqalında
Azərbaycanın sabiq FİFA referilərinin adı oyun alverində hallandırılır. Azerisport.az xəbər verir ki, söhbət hazırda AFFA Hakimlər Komitəsinin sədri olan Xaqani Məmmədov və Ramiz Əsədovdan gedir.
Qeyd edək ki, 2001-ci ildə, ilyulun 28-də UEFA Kubokunun "Osiek" (Xorvatiya) və "Dinaburq" (Latviya) arasındakı cavab matçını məhz azərbaycanlı hakimlər idarə ediblər. İlk görüşdə 1:2 hesabıyla məğlub olan balkanlıları növbəti mərhələyə vəsiqə qazanmaq üçün evdə 1:0 da qane edirdi. Avropa futbol təşkilatı bu oyunun idarəçiliyini Asim Xudiyev, Rufulla Kərimov, Ramiz Əsədov və Xaqani Məmmədovdan ibarət azərbaycanlı hakimlər briqadasına tapşırmışdı.
Latviyalılar birinci hissədə qapısında qol görüb. Asim Xudiyevin 44-cü dəqiqədə təyin etdiyi penaltini Yosip Balatineç qonaqların qapısından keçirib. Bu hesab "Osiek"i növbəti mərhələyə çıxaracağından, Latviya klubunun rəsmiləri ikinci hissənin gedişində azərbaycanlı hakimlərə rüşvət təklif edib. Bunu aşağıdakı videoda Xaqani Məmmədovun özü deyir. Xorvatiyada 4-cü hakim funksiyasını yerinə yetirən AFFA Hakimlər Komitəsinin hazırkı sədri 72-ci dəqiqədə, "Dinaburq" sonuncu əvəzləməni edərkən aşkar şəkildə rüşvət almağa cəhd göstərir. O, öncə laynsman Ramiz Əsədova qışqırır ki, Asim Xudiyevə latviyalıların "təklif"ini çatdırsın. Baş hakim köməkçisinin sözlərini yaxşı başa düşmədiyindən, bu dəfə Xaqaninin özü "Asim, qonaqlar "niçya"ya 15 dənə verir" söyləyib.
Xudiyev bu xəbərdən sonra çox "çalışsa" da, hesab dəyişməz qalıb.
