Neftçi çempion oldu
Bayıl stadionunda U-12 Liqanın final oyunu keçirilib. Azerisport.az xəbər verir ki, "Qəbələ" və "Neftçi" komandaları arasında keçirilmiş qarşılaşma 2:0 hesabı ilə paytaxt komandasının xeyrinə başa çatıb.
Final oyunu başa çatdıqdan sonra mükafatlandırma mərasimi təşkil olunub. 41 qolla liqanın bombardiri olmuş "Xəzər Lənkəran" komandasının üzvü Musa Musazadəyə buts hədiyyə edilib. Final qarşılamasının ən yaxşı oyunçusu, "Qəbələ" komandasında çıxış edən Rauf Məhərrəmov Braziliyada keçiriləcək dünya çempionatının rəsmi topu "Brazuca" ilə təltif olunub. Feyr-pley mükafatına isə "Neftçi" komandasının futbolçusu Nihat Vəliyev layiq görülüb.
Liqanı üçüncü pillədə başa vurmuş "Bakı", ikinci yeri tutmuş "Qəbələ" və turnirin qalibi "Neftçi" müvafiq olaraq bürünc, gümüş və qızıl medallarla təltif edilib. Sonda "Neftçi" komandasına kubok təqdim olunub.
Mükafatları AFFA-nın baş katibi Elxan Məmmədov, "Atropatena" şirkətinin İdarə Heyətinin sədri Elşad Rəsulov və futbol veteranı Rüstəm Rəhimov təqdim edib.
