"Gimnastlarımız AÇ-yə tam hazırdır"

Bədii gimnastika üzrə Azərbaycan millisinin baş məşqçisi Mariana Vasilevna azərisport.az-a açıqlamasında bu gün İsraildə start götürən Avropa çempionatı haqda danışıb:

"Avropa çempionatı hər zaman bizim üçün vacib yarış sayılıb. Gimnastlarımız mötəbər yarışa hazırdır. Əsas məqsəd ölkəmizi layiqincə təmsil etməkdir. Yaxşı çıxış edən zaman nəticə də olur.

Qitə birinciliyində individual yarışlarda Marina Durunda, Jalə Piriyeva və Ayşən Bayramova eləcə də qrup hərəkətləri üzrə yığma komandamız mübarizə aparacaq. Avropa çempionatı yuniorlarımız Zöhrə Ağamirova, İlahə Məmmədova, Veronika Qudis üçün böyük sınaq olacaq. Avropa çempionatında hər zaman güclü rəqabət olub. Bu dəfə də belədir.

Son hazırlıqdan sonra deyə bilərəm ki, gimnastlarımız Avropa çempionatına tam hazırdır. Komandamızın yarışda layiqli çıxış edəcəyinə inanırıq. Avropa çempionatında sonra bütün diqqət Bakıda keçiriləcək Dünya Kubokuna yönələcək. Bundan sonra isə idmançılarımızı Brazıliyada baş tutacaq Yay Olimpiya Oyunları gözləyir".