12 yanvar 2012 15:26
Azərbaycan idman gimnastikası tarixində ilk (FOTO)
Azərbaycan gimnastı Şakir Şıxəliyev bu yay Londonda keçiriləcək Olimpiya oyunlarına lisenziya qazanıb. Azerisport.az xəbər verir ki, bu barədə Azərbaycan Gimnastika Federasiyasının mətbuat xidməti məlumat yayıb.
Məlumatda deyilir ki, Ş.Şirəliyev milli idman gimnastikasının çoxdan arzusunda olduğu bu lisenziyaya gələcək Olimpiadanın vətənində ikinci təsnifat turnirində sahib olub. O, çoxnövçülük yarışlarında 80.532 bal toplayaraq, Olimpiya oyunlarında iştiraklarını təmin etmiş idmançılar sırasına daxil olub.
Ş.Şıxəliyev müstəqil Azərbaycanın idman gimnastikası tarixində Olimpiadaya vəsiqə qazanmış ilk idmançı olub. Azərbaycan Olimpiadada idmanın bu növündə sonuncu dəfə uzaq 1992-ci ildə Barselonada Valeri Belenki ilə təmsil olunmuşdu. V.Belenki o zaman qızıl medal qazanmışdı. V.Belenkinin artıq üç ildir SSRİ-nin Əməkdar Məşqçisi Anatoli Yarmovski ilə birlikdə Şıxəliyevi məşq etdirməsi də tamamilə rəmzi bir haldı.
Olimpiya lisenziyasının sahibi bu münasibətlə fikirlərini açıqlayıb: “Mən son dərəcə xoşbəxtəm və qürur hissi keçirirəm ki, doğma Azərbaycanı bu dəfə Olimpiadada təmsil edəcəyəm! Gərgin məşqlərim hədər getmədi. Hətta məşqlər zamanı keçirdiyim müəyyən əsəbilik bu gün altı alətin hamısında bir dəfə də büdrəmədən inam hissi ilə çıxış etməyimə əngəl ola bilmədi. Mənə və məşqçilərimə inanan federasiyaya, mənim üçün həyəcan və narahatlıq keçirən hər bir kəsə minnətdarlığımı bildirmək istəyirəm”.
Beləliklə, Azərbaycan yığmasının aktivində artıq 30 Olimpiya lisenziyası var.
