Bədavi Hüseynov: Qarabağ Beşiktaşla oynayacaq səviyyədədir
"Qarabağ"ın müdafiəçisi Bədavi Hüseynov Topaz Premyer Liqasının 14-cü turu çərçivəsində "İnter"lə oyun öncəsi azerisport.az saytının suallarını cavablandırıb:
- "İnter"lə oyunda nəyə ümid edirsiniz?
- Çempionatda zəif komanda yoxdur. "İnter" də indi çox yaxşı formadadır. İlk dövrədə onlar bizə qalib gəlmişdilər. Buna görə bizim üçün vacib oyundur. Qələbə qazanıb, fasiləyə yaxşı əhvalda yollanmaq istəyirik.
- Son günlərdə millimizin hücumçusu Ramil Şeydayevin Türkiyə "Trabzonspor"unu "Neftçi"yə dəyişəcəyinə dair xəbərlər dolaşır. Sizcə, onun Türkiyədə qalması daha yaxşıdır, ya Azərbaycana gəlməsi?
- Ramil yaxşı futbolçudur, perspektivlidir. Daha çox oynamasına ehtiyac var. Necə addım atmaq lazım olduğunu Şeydayev özü gözəl bilir. Amma təbii ki, Ramilin "Neftçi"yə gəlişi bu klubu gücləndirər.
- Kubokun yarımfinalındakı rəqibiniz böyük ehtimalla məhz "Neftçi" olacaq. Bu oyunu erkən finalsaymaq olar?
- Kubokda hər oyun finala bərabər olur. Uduzsan, turniri tərk edirsən. İndi yarımfinal barədə danışmaq istəmirəm. 1/4 finalın cavab oyunundan sonra danışarıq.
- "Neftçi" ilkoyunda "Zirə"yə 3 cavabsız qolla qalib gəldiyi halda, siz "Sumqayıt"ı 6 topla məğlub etdiniz...
- Böyük motivasiya ilə oynadıq. Ona görə də belə hesabla qalib gəldik.
- Bəlkə "Qarabağ" Avroliqanı unutmaq üçün belə hesabla qalib gəlməyə çalışdı...
- Bu oyuna da digər görüşlərdə olduğu kimi, qələbə üçün çıxmışdıq. Hərdən hücumda hər şey alınır. "Sumqayıt"la oyunda da elə oldu. Ümid edirəm ki, cavab görüşündə sürpriz olmayacaq. Əsas odur ki, sakitləşmək olmaz.
- Deyilənə görə, 2017-ci ilin yanvar ayında "Qarabağ" Bakıda Türkiyə "Beşiktaş"ı ilə yoxlama oyunu keçirəcək...
- Mən bu barədə eşitməmişəm. Belə bir oyun bizim üçün böyük təcrübə olar. Biz "Beşiktaş"la oynayacaq səviyyədəyik. Fikrimcə, maraqlı oyun olacaq. Bu görüş həm də klublarımız arasındakı əlaqələrin möhkəmlənməsinə imkan verər.
- Türkiyəli mütəxəssis Güvənc Kurtar saytımıza açıqlamasında bildirib ki, Riçard Almeydanı və sizi "Beşiktaş"a məsləhət görüb. Belə bir imkan yaransa, keçidə razı olarsız?
- "Beşiktaş" böyük klubdur. Belə bir klubdan təklif almaq çox xoş olar. Amma indi məni belə təkliflər narahat etmir. Mənim "Qarabağ"la müqaviləm var və bütün diqqətimi komandamın oyununa yönəltmişəm.
