“Ozobiçin Xorvatiya millisinə dəvət almasında heç bir gözlənilməzlik yoxdur”

"Bakı"nın xorvatiyalı sabiq kapitanı Ernad Skuliç "Qəbələ"nin yarımmüdafiəçisi Filip Ozobiçin Xorvatiya millisinə dəvət almasına münasibət bildirib. Azerisport.az saytına açıqlamasında o, bunları söyləyib:

"Ölkəsinin yığma komandasında oynamaq hər bir futbolçu üçün sevindirici faktdır. Ozobiçlə yanaşı, yerli çempionatdan da milliyə xeyli oyunçu dəvət alıb. Ozobiçin "Qəbələ"də uğurlu çıxış etdiyini Azərbaycan mətbuatından öyrəndim. Onun Xorvatiya millisinə dəvət almasında heç bir gözlənilməzlik yoxdur. "Qəbələ" ardıcıl ikinci ildir Avropa Liqasının qrup mərhələsində çıxış edir. Bu üzdən də onun oyunçusunun milliyə dəvət alması normaldır. Digər tərəfdən, Ante Çaçiç də Azərbaycan çempionatını izləyir. Ozobiçi dəvət etməklə də doğru addım atdı. Əlbəttə, Rakitiç, Modriç çox güclü futbolçudur. Amma Ozobiç də gəncdir və millidə möhkəmlənə bilər. Çaçiç böyük ehtimalla Robert Prosineçkinin də məsləhətlərinə qulaq asıb. Çünki o, Azərbaycandakı bütün futbolçuların çıxışından xəbərdardır. Şadam ki, Azərbaycan çempionatından Xorvatiya millisinə oyunçu dəvət edildi. Mən Azərbaycanda oynadığım dövrdə bu, mümkünsüz idi. Deməli, çempionatınız inkişaf edir. Amma hazırda orada xorvatiyalı futbolçuların sayının niyə az olduğunu anlamıram. Mənim dövrümdə xorvatlar orada çox idi. Görünür, indi onlara etimad göstərilmir".