Qurban Qurbanov ilin ən yaxşısı seçilməsindən danışdı

"Qarabağ"ın baş məşqçisi Qurban Qurbanov "Komanda" qəzetinin jurnalistlər arasında keçirdiyi sorğuda 2016-cı ilin ən yaxşı məşqçisi elan olunmasına münasibət bildirib. Azerisport.az xəbər verir ki, o, mükafatın təqdim edilmə mərasimində bunları söyləyib:

"Mənim üçün bu mükafat qiymətlidir. Bundan sonra da işimi daha da yaxşı şəkildə görməyə çalışacağam. Ancaq Azərbaycan futbolu barədə düşünürəm. Sağ olun ki, mənim əziyyətimi qiymətləndirirsiniz. Bizim jurnalistlər dünyanın ən yaxşısıdır. Xalqımız digər millətlərdən fərqlənir. Hər sahədə yaxşı mənada fərqlənirik. Elə xüsusiyyətlər var ki, digər millətlərdə ona rast gəlmək olmur. Ola bilər ki, hər şeyi reallaşdıra bilmirik. Daha yaxşı nəticələr qazanmağa davam etməliyəm. Bu il ən yaxşı məşqçi adını Robert Prosineçki haqq edirdi. Azərbaycan yığması indiyə qədər heç bir seçmə mərhələnin əvvəlində bu qədər xal toplamamışdı. Onun gəlişindən sonra milliyə inam artıb. Roman Qriqorçukun da son illər futbolumuzun inkişafında öz payı var. Mənə haradasa asandır, çünki Bakıda çalışıram. Amma Qriqorçuk Qəbələdə çalışmaqla belə uğurlar qazanır. Bir sözlə, Prosineçki ilə Qriqorçuk da bu gün mənim yerimdə ola bilərdi. Bu cüt titullardan sonra daha da məsuliyyətli olmalıyam. Tənqidlərdən küsməyə haqqımız yoxdur. Əvvəllər bizi valideynlərimiz tənqid edərdilər, onu da bizə görə edərdilər. Sizin tənqidiniz də bizim xeyrimizədir. Hamınıza təşəkkür edirəm, uğurlar arzulayıram. Mən mətbuata həmişə açığam".