Kərim Diniyev: Cütün taleyi Gəncədə müəyyənləşəcək
"Kəpəz"in yarımmüdafiəçisi Kərim Diniyev Azərbaycan Kubokunun 1/4 final mərhələsi çərçivəsində "İnter"ə qarşı keçirdikləri oyundan (0:2) sonra azerisport.az saytının suallarını cavablandırıb.
- Çempionatda iki oyunda uduzmadığınız "İnter"ə kubokda məğlub oldunuz. Niyə?
- Oyunumuz alınmadı. Çətin olacağını bilirdik. Amma görünür qismət belə imiş ki, uduzduq.
- İlk oyundakı 0:2 hesablı məğlubiyyət sizin şansınızı 60-70% azaltdı. Razısız?
- Əlbəttə, məğlubiyyət şansımızı xeyli azaltdı. Amma hələ hər şey bitməyib. Yarımfinala kimin çıxacağına Gəncədəki oyunda aydınlıq gələcək. Lazım olan nəticəni qazanmağa çalışacağıq.
- Epizodların birində Şahin Diniyev sizə nəsə irad bildirdi. Nə deyirdi?
- İlk zərbəm alınmadı. İkinci epizodda vura bilərdim, amma ötürmə etdim. Baş məşqçi də bu qərarımla razılaşmadı və soruşdu ki, niyə özün zərbə vurmadın?
- Gəncədəki oyunda əsas üstünlük qazonun vəziyyəti ola bilərmi?
- Gəncədə əsas üstünlüyümüzü doğma meydanda oynamağımız, fanatlarımızın dəstəyidir. Onlar bizi həmişə dəstəkləyirlər.
- Ötən mövsümlə müqayisədə bu il hücum xəttiniz çox dişsiz görünür. Bu, Dario Juniorun yoxluğunun nəticəsidir?
- Səbəb təkcə onun yoxluğu deyil. Qol vura bilmiriksə, burada bütün komandanın günahı var.
- Üç gün sonra "Qəbələ" ilə çempionat oyununuz var. Bu oyun daha vacibdir, ya "İnter"lə kubokun cavab görüşü?
- Fərqli oyunlar olsa da, hər ikisi bizim üçün çox önəmlidir. Hər ikisindən qalib ayrılmaq istəyirik.
- "Kəpəz" uduzanda ən çox özünüzə, komandanıza, ya Şahin Diniyevə görə üzülürsünüz?
- Komandamıza görə pis oluram. Buraya oyunçular da, məşqçilər də, digər işçilərimiz də daxildir. Hamımız əziyyət çəkirik.
- Qardaşınız Coşqun Diniyev "Qarabağ"ın heyətində qol vurdu. Onu təbrik etdiniz?
- Təbrik etdim. Ona görə çox sevindim.
