Səlahət Ağayev: İki gün öncə maaşımızı aldıq, İnterdə hər şey qaydasındadır

"İnter"in qapıçısı Səlahət Ağayev Azərbaycan Kubokunun 1/4 final mərhələsi çərçivəsində "Kəpəz"ə qarşı oyundan (2:0) sonra azerisport.az saytının suallarını cavablandırıb:

- Oyun barədə nə deyə bilərsiniz?
- Yaxşı oynadıq. Bunun da nəticəsi kimi qələbə qazandıq. Özü də yaxşı hesabla. Qol buraxmamaq vacib idi. Lakin yenə də arxayınlaşmaq olmaz. Gəncədə bizi çətin cavab matçı gözləyir.

- Bu mövsüm çempionatda gəncəlilərlə hər iki oyun heç-heçə bitmişdi. Bu baxımdan müəyyən gərginlik yox idi?
- Xeyr. Komandamız da, nəticələrimiz də sabitdir. Qələbə qazana bilməyəndə də ən azı uduzmuruq. Komandada hər şey qaydasındadır.

- 2:0 yarımfinala çıxmaq üçün yetərlidir?
- Futbolda hər şey ola bilər. Həm də biz 5:0 hesabıyla qalib gəlməmişik ki, o dərəcədə arxayın olaq. Mərhələ adlamaq istəyiriksə, sonadək mübarizə aparmalı, cavab matçında da uğurlu nəticə qazanmalıyıq.

- Matçın sonunda bir neçə qol şansını boşa verdiniz. Cavab matçında bunun sizə baha başa gələcəyindən ehtiyatlanmırsınız?
- Onları qola çevirməyimiz əla olardı. Fikrimcə, 2:0 ilk oyun üçün pis nəticə deyil.

- Qarşıda "Qarabağ"la çempionat oyunu var...
- "Qarabağ"ın Avropa Liqasının pley-off mərhələsinə vəsiqə qazana bilmədiyini nəzərə alsaq, onlar tam çempionata köklənəcəklər. Amma mən komandamıza inanıram. Ən azından xal qazanacağımıza.

- "İnter"də yenidən maliyyə problemlərinin yarandığı, buna görə qışda bəzi futbolçuların komandanı tərk edəcəyi bildirilir...
- Biz də bu barədə eşitmişik. Amma komandamızda hər şey qaydasındadır. İki gün əvvəl də maaşımızı almışıq.

- Sizə başqa klublardan dəvət gəlməyib?
- Mənim klubla müqaviləmin müddəti may ayına qədərdir. Ona görə də indi bu barədə heç nə deyə bilmərəm.