Jonas Pessalli: Neftçinin lideri olmaq istərdim

“Neftçi”nin hücumçusu Jonas Pessalli Azərbaycan Kubokunun 1/4 final mərhələsinin ilk oyunu çərçivəsində “Zirə” üzərində 3:0 hesablı qələbədən sonra jurnalistlərin suallarını cavablandırıb. Azerisport.az saytının əməkdaşının da iştirak etdiyi müsahibədə braziliyalı vurduğu 3 qoldan, komandasındakı lider problemindən danışıb.

- Matçla bağlı fikirləriniz necədir?
- Oyun gözlədiyimiz kimi çətin başladı. Məşqçi tapşırmışdı ki, yaxşı müdafiə olunaq, imkan düşdükcə əks-hücumlar təşkil edək. Bunu bacardığımız üçün çox sevinirəm.

- Bu matçda 3 qol vurmağınız sizin üçün gözlənilməz olmadı ki? Ümumiyyətlə, daha öncə het-trik etmişiniz?
- Qol vuracağıma əmin idim, amma 3 qol gözləmirdim. Bundan öncə də Fransa kubokunda het-trik etmişdim. Bu, ikinci dəfədir. Əsas odur ki, komandamız qalib gəldi.

- Baş məşqçi göstəriş verməsəydi, penaltini “Panenka zərbəsi” ilə vuracaqdınız?
- “Panenka zərbəsi”ni heç məşqlərdə belə yoxlamamışam. Ona görə də heç ağlımdan keçmirdi. Sadəcə, elə alındı.

- “Neftçi” artıq yarımfinaldadır?
- Hələ yox. Kubok oyunu 180 dəqiqədən ibarətdir. Biz ilk addımımızı atdıq. Cavab matçında daha yaxşı oynamaq lazımdır. Bugünkü oyuna görə bütün komanda yoldaşlarıma, azarkeşlərə təşəkkür edirəm. Qələbə münasibəti ilə “Neftçi” rəhbərliyini də təbrik edirəm.

- Sizi tədricən “Neftçi”nin liderinə çevrildiyinizi söyləmək olar?
- Xeyr, belə bir söz deyə bilmərəm. Hər birimizin öz funksiyamız var. Əlimizdən gələni edirik ki, komandaya köməyimiz dəyə.

- Bəlkə elə lider olmadığı üçün “Neftçi” bu vəziyyətdədir? Sizin belə bir iddianız var?
- Futbol kollektiv oyundur. Amma liderin də olması da önəmlidir. Hər bir oyunçu öz üzərində işləyir ki, komandasının lideri olsun. Mən də "Neftçi"nin lideri olmaq istərdim. Bunu kim istəməz ki?