Aqil Məmmədov: Bizim də qalib gəlmək zamanımız yetişib
AZAL-ın qapıçısı Aqil Məmmədov Azərbaycan Kubokunun 1/4 final mərhələsi çərçivəsində qarşılaşacaqları "Qəbələ" ilə ilk oyun öncəsi azerisport.az saytının suallarını cavablandırıb:
- 1/8 finalda "Zaqatala"nı çox çətinliklə keçən "Qəbələ"ni mübarizədən kənarlaşdıra biləcəksiniz?
- "Qəbələ"nin "Zaqatala"nı çətinliklə, penaltilər seriyasında üstələdiyini bilirəm. Amma bunu "Qəbələ"nin zəifliyi, ya da komandada hansısa problem olması ilə əlaqələndirmirik. Onlar istənilən halda güclüdürlər. Rəqibimizin iki güclü heyəti var.
- Elə isə ilk oyundakı hədəfiniz uduzmamaq olacaq?
- Təbii ki, Qəbələdə qol vurmağa və uduzmamağa çalışacağıq. Ev oyununda isə qələbəyə oynayacağıq. "Qəbələ" çox güclü komandadır. Premyer Liqada çempionluğa oynaması da bundan xəbər verir. Amma bizim də qələbə qazanmaq zamanımız yetişib.
- Premyer Liqada hələ də qələbə qazana bilməməyiniz təzyiq yaradır?
- Biz də qələbə qazanmağı çox istəyirik. Lakin hələ alınmır. Görünür, qismət belədir.
- Premyer Liqanın bu ilki son turunda keçmiş komandanız "Neftçi" ilə qarşılaşmada ilk qələbənizi rəsmiləşdirməyinizi gözləmək olar?
- Təbii ki, hədəfimiz yalnız qələbə qazanmaq olacaq. Biz heç də pis oynamırıq. Sadəcə, qələbə qazana bilmirik. Artıq xal ehtiyatımızı yaxşılaşdırmaq zamanıdır.
- Bu oyun sizin üçün yenə xüsusi əhəmiyyət kəsb edəcək?
- "Neftçi"dən normal ayrılmışam. Ona görə də hər şey qaydasındadır. Nəinki "Neftçi"yə, ümumiyyətlə, hər bir rəqibə uduzmaq üzücüdür. Fasiləyə yaxşı əhval-ruhiyyədə yollanmaq istəyirik. Buna görə də "Neftçi" üzərində qələbə qazanmaq lazımdır.
- Sizin "Neftçi"yə qayıdacağınız, hətta "Qəbələ"yə keçəcəyiniz də iddia olunur...
- Heç kimdən belə bir təklif almamışam. Hazırda AZAL-dayam və qarşıdakı oyunları düşünürəm.
- Uzun müddətdir yığma komandaya da dəvət almırsınız...
- Yenə də deyirəm ki, hazırda yalnız klubumun oyunlarını düşünürəm. Qarşıda üç vacib oyunmumuz var. Amma təbii ki, yığmaya dəvət etsələr, məmnuniyyətlə gedərəm.
