Elxan Abdullayev: Faciəvi vəziyyətlə üzləşmişik
"Neftçi"nin baş məşqçisi Elxan Abdullayev Azərbaycan Kubokunun 1/4 final mərhələsi çərçivəsində "Zirə"yə qarşı keçirəcəkləri ilk oyun öncəsi fikirlərini bölüşüb. Azerisport.az saytına açıqlamasında o, bunları söyləyib:
"Böyük itkilərlə üzləşmişik. Mahir Şükürov, Cavid İmamverdiyev və Araz Abdullayev bu oyunu buraxacaq. Jonas Pessalli ilə Məqsəd İsayevin də meydana çıxması sual altındadır. Bəzi klublarımız ev oyunlarını süni örtüklü meydanda keçirir. Bu üzdən biz də oxşar meydançalarda hazırlıq keçməyə çalışırıq. Bu da nəticəsi. Faciəvi vəziyyətlə üzləşmişik. Bütövlükdə, 14 futbolçumuz qalıb ki, onların da 8-i gənclərdir. Şübhəsiz ki, "Zirə" hazırkı məqamda bizdən üstündür. Amma məğlub olmağa hazırlaşmırıq. Oynayacağıq. Necə alınacaq, görəcəyik. Gənclər üçün bu, özünü göstərmək baxımından yaxşı şansdır. Bizi "Zirə" ilə iki oyun gözləyir. Sabah ən azından qol buraxmamağa çalışacağıq. Cavab oyununda isə zədəlilərin sıraya dönməsinə ümid edəcəyik və doğma meydanda qələbəyə oynayacağıq".
