Zaur Svanadze: Bu heyətlə uğur qazana bilərik, amma kimsə getsə, böyük problem olacaq

"İnter"in baş məşqçisi Zaur Svanadze Azərbaycan Kubokunun 1/4 final mərhələsi çərçivəsində "Kəpəz"ə qarşı keçirəcəkləri oyun öncəsi azerisport.az saytının suallarını cavablandırıb:

- Qarşıdakı oyunda şanslarınızı necə qiymətləndirə bilərsiniz?
- Çətin olacaq. Bizi bu rəqiblə iki ağır matç gözləyir. Kubokda artıq ən güclülər qalıb. Hər bir komanda finala çıxmağı hədəfləyib. İlk oyun öz meydanımızdadır və mütləq qələbə qazanmalıyıq. Qol buraxmamaq da vacibdir.

- Heyətlə bağlı itki var?
- Heç kimin zədəsi yoxdur. Yalnız Abbas Hüseynovla Mirsahib Abbasov xəstələnib. Böyük ehtimalla, onlar bizə kömək edə bilməyəcəklər.

- "İnter" hazırda Premyer Liqada 3-cüdür, Avroliqaya vəsiqə qazana bilərsiniz. Amma qarşıdakı iki transfer dönəmində heyətə heç bir oyunçu qata bilməyəcəksiz. Belə bir vəziyyətdə baş məşqçi özünü necə hiss edir?
- Bu, bir tərəfdən yaxşıdır. Çünki avrokuboklara vəsiqə qazansaq, yeni futbolçu gətirməyə, oyun sxemində nələrisə dəyişməyə ehtiyac olmayacaq. Xeyli müddət bir yerdə oynamış heyətə malik olacağıq. Bu heyətlə uğur qazana bilərik. Amma digər tərəfdən təbii ki, belə bir qadağanın olması pisdir. Kimsə getsə, onun yerini doldura bilməyəcəyik. Belə olan halda böyük problem yaşaya bilərik.

- Heyətdəki futbolçuları saxlamağı bacaracaqsız?
- Müqaviləsi olan futbolçu necə gedə bilər? Bu, qeyri-peşəkarlıqdır. Müqaviləsi olan futbolçu oynamalıdır. Ümid edirəm ki, belə bir hal yaşanmayacaq.

- Futbolçu getməyə qərar verəndə, onu saxlamaq çətin olur. Rəhbərlik o oyunçuları heyətdə saxlamaq üçün maaşlarını artıra bilərmi?
- İndi bu barədə heç nə deyə bilmərəm. Çünki belə bir söhbət olmayıb. Ümid edirəm ki, hər bir futbolçu öz müqaviləsinə əmək edəcək.

- Amma Ruslan Abışovun qışda "Neftçi"yə keçəcəyi barədə xəbərlər dolaşır...
- Mənə bu barədə heç kim bir söz deməyib. Ümid edirəm ki, Abışov da müqaviləsinə uyğun davranacaq. Futbolçularımız gözəl başa düşürlər ki, belə bir məqamda getməklə bizi çox pis vəziyyətdə qoyacaqlar. Ona görə də biz bu heyəti növbəti mövsüm üçün də saxlamaq istəyirik. Baxmayaraq ki, əksər futbolçuların müqavilə müddəti bu mövsümün sonuna kimidir.