Zaur Həşimov: İnterlə oyundan sonra da Qarabağın bir daha belə şansının olmayacağı deyilirdi
"Qarabağ"ın sabiq müdafiəçisi Zaur Həşimov Ağdam klubunun Avropa Liqasının qrup mərhələsi çərçivəsində İtaliya "Fiorentina"sına qarşı keçirdiyi oyundan danışıb. Azerisport.az saytına açıqlamasında o, bunları söyləyib:
"Qarabağ"ın ötən mövsüm Milan "İnter"inə qarşı keçirdiyi oyunu da yaxşı xatırlayıram. O oyundan da sonra hamı bir daha belə bir şansın ələ düşməyəcəyindən danışırdı. Amma komanda yenə qrup mərhələsinə vəsiqə qazandı, hətta pley-offa çıxmağa çox yaxın idi. Bu dəfə də alınmadı. Məyusuq, amma yenə belə şansımız olacaq. "Qarabağ" "Fiorentina"ya qarşı səbrli və diqqətli oynadı. Qola qədər qonaqların heç bir təhlükəli hücumu olmamışdı. Dino Ndlovunun birinci hissədəki qol epizodunu dəyərləndirməsi yaxşı olardı. Amma alınmadı. Reynaldo hesabı bərabərləşdirəndə isə hamımız ruhlandıq, qələbə ümidimiz ardı. Təəssüf ki, sevincimiz qısa sürdü. Hakim İvan Bebekin idarəçiliyinə gəlincə, xırda follar "Fiorentina"nın xeyrinə idi. Bu da nəticəyə təsirsiz ötüşmədi. Növbəti mövsümdə hər şeyə yenidən başlamaq lazımdır".
