Milan Antiç: Qəbələnin çıxışını uğurlu hesab edirəm
"Qəbələ"nin sabiq müdafiəçisi Milan Antiç komandanın Avropa Liqasının qrup mərhələsindəki çıxışını şərh edib. Azerisport.az saytına açıqlamasında o, öncə bunları söyləyib:
"Bütövlükdə götürsək, bu avrokubok mövsümü "Qəbələ" və Azərbaycan futbolu üçün pis alınmadı. Ardıcıl ikinci il Avroliqanın qrup mərhələsində oynamaq asan iş deyil. Düzdür, komanda altı oyunun hamısında uduzdu. Amma burada problem başqadır. Milli çempionatda güclü rəqabət yoxdursa, Avropada da uğur qazanmaq çətindir. Bu problem Serbiya futbolunda da var".
Serbiyalı futbolçunun sözlərinə görə, Premyer Liqanın daha güclü olması üçün bütün klubların səy göstərməsi lazımdır: "Yalnız belə olan halda çempionatı daha da güclü etmək olar. Serbiyada da gənc futbolçulara daha çox üstünlük verilməkdədir və bu üzdən də rəqabət çox zəifdir. Məhz buna görə klublarımız Avroliqanın qrup mərhələsinə vəsiqə qazanmaqda da çətinlik çəkirlər".
"Qəbələ"nin ardıcıl ikinci il Avroliqada oynaması da uğurdur. Daha ciddi nəticələr üçün isə, çempionat daha güclü olmalıdır. Ola bilər ki, bu, kimlər üçünsə normal görünür, amma mənə elə gəlir ki, bütün təsnifat mərhələlərini uğurla adlayıb, qrup mərhələsinə vəsiqə qazanmaq çox çətindir. Klub rəhbərliyi hansı mövqeləri gücləndirmək lazım olduğuna diqqət yetirməlidirlər. Heyəti gücləndirmək növbəti mövsüm yenə qrup mərhələsinə çıxa bilərlər".
Antiç ardıcıl altı məğlubiyyətə görə çox üzülməyə ehtiyac olmadığıın bildirib: "Qəbələ" 2005-ci ildən böyük futboldadır. Belə qısa müddət ərzində indi "Anderlext", "Maynts", "Sent-Etyen" kimi adlı-sanlı rəqiblərlə qarşıaşır. Bu komandalrın hamısı güclüdür, onların mübarizə apardığı çempionatlar Azərbaycan çempionatı ilə müqayisə oluna bilməz. Ona görə də "Qəbələ"nin Avroliqadakı çıxışını uğurlu hesab edirəm".
