“Bu sözü David Canelidzenin söylədiyini deməmişəm”

"Rəvan"ın futbolçusu Zahid Quliyev Azərbaycan Kubokunun 1/8 final mərhələsi çərçivəsində AZAL-a qarşı keçirdikləri oyundan sonra rəqib futbolçu David Canelidze barədə açıqlaması ilə gündəmi zəbt etdi. Belə ki, onun iddiasına görə, gürcü futbolçu matçın sonlarında komanda yoldaşlarına qışqırıb ki, "işaqlar, mənim "stavkam"ın düzəlməsi üçün daha bir qol vurmaq lazımdır".

Lakin Quliyev azerisport.az saytına açıqlamasında belə bir söz demədiyini bildirib: "Mən David Canelidzenin adını çəkməmişəm və kiminsə elə-belə futboldan kənarlaşdırılmasını istəməzdim. Mən sadəcə, onu bildirdim ki, AZAL-ın vurduğu qoldan sonra rəqib oyunçulardan hansısa sevinərkən bildirdi ki, daha bir qol vurmaq lazımdır. Bundan sonra mən əsəbləşmişdim və Davidin kürəyinə zərbə endirdim. Halbuki, əslində o, heç nədə günahkar deyildi. Davidin özü ilə söhbətim olub. Halbuki, heç buna ehtiyac yoxidi. Onun özünə də bildirdim ki, mən heç kimin adını çəkməmişəm".