Ansi Aqolli: Pley-offa çıxmaq üçün çox güc sərf etsək də...
"Qarabağ"ın müdafiəçisi Ansi Aqolli Avropa Liqasının qrup mərhələsi çərçivəsində İtaliya "Fiorentina"sına qarşı keçirdikləri oyundan (1:2) sonra azerisport.az saytının suallarını cavablandırıb:
- Məğlubiyyətin səbəbini nədə görürsünüz?
- Çətin oyun olacağını hamımız yaxşı dərk edirdik. Yaxşı oyun sərgiləməyə çalışdıq, meydanda var gücümüzü qoyduq. Təəssüf ki, uğur qazanmaq mümkün olmadı. Əsas odur ki, xarakter göstərməyi bacardıq. "Fiorentina"ya qarşı son saniyəyə kimi mübarizə apardıq.
- Qarlı havada oynamaq çətinlik yaratmırdı?
- Hava şəraitinə görə şikayətlənməyə dəyməz. Çünki rəqib də eyni şərtlər altında oynayırdı. Tribunadakı atmosfer də gözəl idi. Azarkeşlərimizi sevindirməyi çox istəyirdik.
- Dino Ndlovu ilk yarıda hesabı açsaydı, hər şey tam fərqli ola bilərdimi?
- Dino həmin epizodda fərqlənsəydi, oyunun sonrakı dəqiqələrinin necə keçəcəyini heç kim deyə bilməz. Amma istənilən halda biz əlimizdən gələni etdik ki, yaxşı nəticə qazanaq.
- Reynaldo hesabı bərabərləşdirəndən sonra hamı sizdən ikinci qolu gözlədiyi anda dərhal qapınızdan top buraxdınız...
- "Fiorentina" hətta ən kiçik səhvdən də yararlanmağı bacaran komandadır. Əslində, İtaliya klubunun elə də çox qol şansı olmadı. Sadəcə, əlinə düşən iki şansdan maksimum yararlandı.
- Yəqin ki, iki oyunda məğlub etdiyiniz PAOK-un sizi qabaqlayıb pley-offa çıxması sizin üçün üzücü oldu...
- Futbol belədir. Nə etmək olar... Kimin daha çox xalı varsa, o da qazanır. Bu mövsüm əvvəlkilərlə müqayisədə daha çox xal toplamağı bacardıq. Amma bu, mərhələ adlamağımıza yetmədi. Biz əslində buna məyusuq. Çünki pley-offa çıxmağı çox istəyirdik, bunun üçün çox güc sərf etdik. Azarkeşlərimizi də hər zaman sevindirmək istəyirik.
- Belə oyundan sonra daxili yarışlara köklənmək çətin olmayacaq?
- Artıq ölkə birinciliyinə köklənməyin zamanıdır. Çünki bizi həm çempionatda, həm də ölkə kubokunda vacib oyunlar gözləyir. Arzuladığımız nəticələrə nail olmaq üçün tam hazır olmalıyıq.
