Rəşad Sadıqov: Belə matçlarda bu cür səhvlər bağışlanmır
"Qarabağ"ın kapitanı Rəşad Sadıqov Avropa Liqasının qrup mərhələsi çərçivəsində İtaliya "Fiorentina"sına qarşı keçirdikləri oyundan sonra azerisport.az saytının da suallarını cavablandırıb:
- Oyun barədə nə deyə bilərsiniz?
- Belə oyundan sonra danışmaq çətindir. Əlimizdən gələni etdik. Təəssüf ki, bu il qapımıza nə gəlirsə, qol olur. Elə qollar buraxdıq ki, belə matçlarda bu cür səhvlər bağışlanmazdır.
- Künc zərbəsi öncəsi hakimə topun sizdən çıxmadığını deyirdiniz?
- Top yüz faiz məndən çıxmamışdı. Amma hakimlikdən danışmaq istəmirəm.
- İlk qolda Şehiç səhvə yol verdi?
- Qolda hər birimizin səhvi var. Gərək, zərbə vurmağa da imkan verməyək. Hamımız birlikdə oynayıb uduzmuşuq. Kiminsə adını çəkmək istəmirəm. Ümumiyyətlə, bu il Avropa Liqasında qapımıza nə gedirsə, qol olur. Məsələn, “Slovana” 0:3 hesabı ilə uduzduğumuz oyunda yadıma gəlmir ki, onların 4-cü şansı oldu, amma vura bilmədilər. Bakıdakı oyunda da 2 zərbə 2 qol. “Viktoriya” ilə matçda bir zərbə, bir qol. Bilmirəm, qismətdir, yoxsa nəyisə düz etmirik.
- Vesino ilə niyə tez-tez mübahisə edirdiniz?
- Nə dediyimi söyləyə bilmərəm. Həm ona, həm də digər 3-4 nəfərə lazım olanı dedim.
- Onlar başa düşdülər?
- Fikrimcə, hə. İngilis dilində elə də yaxşı başa düşmürəm. Amma fikrimi izah edə bilirəm.
- İki il əvvəl demişdiniz ki, bu, sizin son şansınızdı. İki il sonra yenə şansınızı əldən verdiniz...
- İki il öncə düşünməzdim ki, bir də belə şey olacaq. Allah bilir bir də necə olacaq. Ola bilər ki, elə ilk təsnifat mərhələsində uduzaq.
- Düşünmürsünüz ki, şansınızı “Slovan”a məğlubiyyətlə itirdiniz?
- Bəli, işimizi çətinə saldıq. Bir epizodu diqqətinizə çatdırmaq istəyirəm. Florensiyadakı oyunda PAOK-un 93-cü dəqiqədə vurduğu qola baxın. Yunan klubunun futbolçusu cərimə zərbəsindən sonra topu əli ilə qabağına atır... Özü də epizodu dünən oyunu analiz edəndə görmüşəm. O qədər bu cür xırda amillər oldu ki, ümumi nəticəyə təsir etdi. Önümüzə baxacağıq. Keçmişlə yaşamaq olmaz. Biz vəsiqəni “Slovan”la oyunda əldən verdik. Bu gün cəhd etdik ki, həmin səhvi düzəldək. Alınmadı.
