Elvin Yunuszadə: İtaliyada baş verənləri unutmuşam
"Qarabağ"ın müdafiəçisi Elvin Yunuszadə Avropa Liqasında İtaliya "Fiorentina"sına qarşı oyun öncəsi azerisport.az saytının suallarını cavablandırıb:
- Həlledici matç öncəsi həyəcan, məsuliyyət, ya gərginlik daha çoxdur?
- Rəqibimiz çox güclüdür. Amma onların oyununu "sındırmaq", öz futbolumuzu sərgiləmək istəyirik. Yalnız belə olan halda lazım olan nəticəni əldə edə bilərik. Komandada hər şey qaydasındadır. Məsuliyyət hissi böyükdür.
- Qalib gələcəyinizə inanırsınız?
- Hər şeyə hazır olmalıyıq. Pis nəticə barədə düşünmürük. Sonadək mübarizə aparıb, hədəfimizə çatmalıyıq.
- Bütün ölkə "Qarabağ"dan qələbə gözləyir. Bu, təzyiqə səbəb olur, ya əksinə komandanı ruhlandırır?
- Komandada atmosfer yaxşıdır. Qalib gəlmək istəyirik.
- Düzünü etiraf edin: "Fiorentina" ilə oyunda meydanda olmaq daha yaxşıdır, ya ehtiyatda qalmaq?
- Meydanda olmaq da çətindi, ehtiyatda qalmaq da. Ümid edirəm ki, azarkeşlərimizi gözəl oyunla sevindirəcəyik.
- Rəqibin heyətində daha çox kimdən çəkinmək lazımdır?
- Xüsusi olaraq kimisə fərqləndirmək istəmirəm. Onların hamısı güclü futbolçulardır.
- Rəşad Sadıqovun meydana çıxması sual altındadır. Onunla söhbətiniz olub?
- Ümid edirəm ki, Rəşad oynayacaq. Heyəti Qurban Qurbanov müəyyənləşdirəcək. O, kimi seçsə, həmin futbolçular da meydanda olacaq.
- Sadıqovsuz "Qarabağ" özünə bənzəmir...
- Komandamızın Rəşadın liderlik keyfiyyətlərinə, təcrübəsinə ehtiyacı var.
- Bu rəqiblə səfər oyununda sizin meydandan qovulmağınız 1:5 hesablı məğlubiyyətə gətirib çıxarmışdı. Yəqin ki, meydana çıxsanız, həmin uğursuz çıxışınızı unutdurmağa çalışacaqsız...
- Həmin oyunda baş verənləri unutmuşam. Oynasam, yalnız bu matç barədə düşünəcəyəm.
- "Qarabağ" pley-offa çıxsa, yəqin ki, Bakı küçələrində böyük bayram olacaq. Bu bayramı azarkeşlərlə bölüşəcəksiniz?
- Qrupdan çıxmağımıza çox sevinərik. Yəqin ki, bunu evdə ailəmlə qeyd edərəm. Əvvəllər belə bir uğura imza atmamışıq. Bu gün "Qarabağ"ın adına layiq oyun sərgiləyib, azarkeşlərimizi sevindirməliyik.
