Samir Abasov: Komandamızda bəzi futbolçular hakimlərdən məndən də çox narazıdır
"Sumqayıt"ın baş məşqçisi Samir Abasov AFFA Hakimlər Komitəsinin sədri Xaqani Məmmədovla FİFA referiləri Əliyar Ağayev və Orxan Məmmədovun bu komandanın üzvləri üçün seminar keçirməsindən söhbət açıb. Azerisport.az saytına açıqlamasında o, bunları söyləyib:
"Şəxsi işlərimlə əlaqədar mən özüm bu görüşdə iştirak etmədim. Amma sonradan məlumat aldım. Bu, yaxşı ideyadır. Əlbəttə, mən hakimlərdən həmişə razı qalmıram. Lakin komandada elə futbolçular var ki, hakimlərdən məndən də çox narazıdır. Onlar yeni qaydalar barədə danışıblar, ayrı-ayrı epizodları izah ediblər. Məsələn, "Kəpəz"lə oyunumuzda futbolçumuz topu rəqibdən alsa da, Əliyar Ağayev rəqibin xeyrinə qayda pozuntusu qərarı verdi. Ondan bunu soruşdum və başa saldı ki, yeni qaydalara görə, top hətta sənin özündə olduğu halda belə, rəqibin ayağına toxunursansa, bu, qayda pozuntusudur. Qaydaları dəqiq bilmək lazımdır".
