Nikos Panayotu: Teo Uiksin dəstəyə ehtiyacı var

Kiprin "Ermis" klubunun baş məşqçisi Nikos Panayotunun azerisport.az saytına müsahibəsi

- Teo Uiksin "Qəbələ"dəki çıxışı ilə maraqlanırsınız?
- Əlbəttə, maraqlanıram.

- Onun Azərbaycan klubundakı çıxışını necə qiymətləndirərdiniz?
- "Qəbələ" çox yaxşı komandadır. Uiks də bu komandaya çox kömək edir. Teo mövsümə çox yaxşı başladı. Avroliqada da uğurlu çıxış edirdi.

- Maraqlıdır ki, Uiks Avroliqaya çox uğurlu start versə də, sonradan həmin oyunu göstərə bilmədi. Sizcə, niyə?
- Uiks elə oyunçudur ki, ona güvənmək lazımdır. Ona güvənirlərsə, deməli, əla oynayır.

- Sizcə, "Qəbələ" Avroliqanın qrup mərhələsindəki ilk beş oyunun hamısında niyə uduzdu?
- Demək çətindir. "Qəbələ"nin çoxlu epizodları yaratdığını görmüşəm. Bəzi oyunlarda qələbəyə də çox yaxın olub. Amma son anda şansını əldən verib.

- Belə bir fikir var ki, Uiks təsnifat mərhələsi çərçivəsində "Maribor"la oyundakı qırmızı vərəqədən sonra "söndü"...
- Ola bilər. Qırmızı vərəqədən sonra futbolçunun özünə gəlməsi çətin olur. Həm də Uiks qarşısında tez-tez qırmızı vərəqə görən futbolçulardan deyil. Amma Teo çox yaxşı oyunçudur və o, komandasına kömək edəcək.

- Əvvəlki Uiksi qaytarmaq üçün nə lazımdır?
- Mən onu həm futbolçu, həm də insan kimi tanıyıram. Onun dəstəyə ehtiyacı var. Onunla söhbət edilməsini istəyir.

- Təsadüfən onu komandanıza qaytarmaq istəmirsiz?
- O, həmişə komandamızın lideri olub. Növbəti yayda onun klubumuza qayıtmasını istəyərəm. Amma indi bu barədə danışmaq hələ çox tezdir.

- Bəs Uiks Kiprə qayıtmaq istəməyib, Azərbaycanda qalmaq istəsə, onda necə?
- Bu transfer barədə danışmaq çətindir. Amma mən onun "Ermis"ə qayıtmasını istəyərəm.