Vadim Abdullayev: Hələ püşkatma zamanı demişdik ki, Qəbələyə qalib gələ bilərik

"Zaqatala"nın yarımmüdafiəçisi Vadim Abdullayev Azərbaycan Kubokunun 1/8 final mərhələsi çərçivəsində "Qəbələ"yə qarşı keçirdikləri səfər oyunundan (2:2, pen. 1:4) danışıb. Azerisport.az saytına açıqlamasında o, bunları söyləyib:

"Zaqatala"nın "Qəbələ"yə qalib gələcəyinə heç kim inanmırdı. Amma biz püşkatmadan dərhal sonra dedik ki, onlara qalib gələ bilərik. Uduzmağı sevmirəm. Oyundan öncə də uşaqlara demişdim ki, Qəbələyə qələbə üçün gedirik və hörmət qazanmalıyıq. Çətin olsa da, oyunu uduzmadıq. Penalti isə lotoreyadır. Düzdür, penaltilər üzərində çalışmışdıq, amma oyun zamanı dəqiq vura bilmədik. Rəqibimizin gücünü hər kəs yaxşı bilir. "Qəbələ" mənim keçmiş komandamdır. Amma oyundan öncə heç bir həyəcan yox idi. Matçdan sonra Roman Qriqorçukla, futbolçularla görüşdüm. Futbol sadəcə, oyundur, dostluq və yaxşı münasibət isə daha önəmlidir".