“Özümü çempionatımızın texnikalı və ağıllı futbolçuları arasında görürəm”

"Qəbələ"nin yarımmüdafiəçisi Rəşad Eyubovun azerisport.az saytına müsahibəsi

- "Qəbələ" Birinci Divizion təmsilçisi "Zaqatala"nı niyə çətinliklə keçə bildi?
- Kubok oyununda tamamilə fərqli atmosfer olur. Burada rəqibin birinci və ya ikinci divizion təmsilçisi olmasının fərqi yoxdur. Aşağı liqa təmsilçilərinin elita klubunu kubokdan kənarlaşdırmasının dünyada çoxlu nümunələri var. Ona görə çətinliklə də olsa, mərhələ adlamağımızdan razıyıq.

- Növbəti mərhələdə də AZAL-la qarşılaşacaqsınız. Razısınız ki, püşk üzünüzə gülür?
- Bizim üçün asan keçilən rəqiblərin düşdüyünü deməzdim. Pley-off oyunları Premyer Liqa matçlarından çox fərqlənir. Əksər komandalar üçün bu, Avropa Liqasına ən qısa yol hesab olunur.

- Amma "Qəbələ" üçün əsas hədəf yalnız avrokuboklara vəsiqə qazanmaq deyil...
- Əlbəttə, əsas hədəfimiz bu mövsüm titul qazanmaqdır. Amma razılaşaq ki, Avroliqada iştirak çox prestijlidir.

- Qrup mərhələsinə vəsiqə qazanıb, oradakı bütün oyunlarda uduzmaq da?
- Ondan başlayaq ki, bu turnirdə oynamaq klubun büdcəsinə faydalıdır. Fikrimcə, heç bir klub hətta altı oyunda uduzmasına rəğmən, milyonlarla avrodan imtina etməzdi. Özü də belə çətin bir dövrdə. Həm də biz özümüz böyük təcrübə toplayırıq. Bir neçə il öncə yəqin ki, heç kimin ağlına da gəlməzdi ki, Azərbaycan klublarının ikisi ardıcıl iki mövsüm Avroliqanın qrup mərhələsində oynayacaq.

- "Qəbələ"nin kuboku qazanması realdırmı?
- Əsas oyundan-oyuna irəliləməkdir. Azərbaycan Kubokunda qələbə qazanmaq bizim arzumuzdur.

- Qarşıda sizi Avropa Liqası çərçivəsində "Maynts"la son turun oyunu da gözləyir...
- Onların da itirəcəyi bir şey qalmayıb, bizim də. Sadəcə, onu başa düşmək lazımdır ki, biz mövsüm ərzində 10 ciddi, yüksək sürətli oyunun iştirakçısı oluruq. Amma rəqiblərimiz üçün belə oyunlar bütün mövsüm ərzində olur, onlar üçün bu, adi haldır. Səviyyə fərqi böyükdür. Bizim üçün məğlubiyyət faciə sayılmamalıdır. Əsas layiqli oynamaq və qələbəyə ümid etməkdir.

- "Anderlext"lə oyundan sonra baş məşqçiniz Roman Qriqorçuk bəyan etmişdi ki, Eyubovun ifaçılıq bacarığı o dərəcədə yüksək deyil ki, topla yaxşı oynasın, düzgün qərarlar qəbul edə bilsin. Onun bu sözlərini necə qarşıladınız?
- O, həm də mənim yaxşı oynadığımı söyləmişdi (gülür). Məşqçi ilə həmin oyun barədə söhbətimiz olub. Onun mənə iradı olmayıb. Ustalığa gəlincə, heç kimi aldada bilmərəm, mən Messi və ya Ronaldo deyiləm ki. Amma özümə görə ustalığım var. Özümü çempionatımızın texnikalı və ağıllı futbolçuları arasında görürəm.