“Ramil Şeydayevin yığmaya faydalı olması üçün klubunda oynaması lazımdır”
Azərbaycan yığmasının sabiq yarımmüdafiəşisi Ramal Hüseynov keçmiş klubu "Qarabağ"ın çıxışından, eləcə də Azərbaycan yığmasının hücumçuları - Dəniz Yılmazla Ramil Şeydayevdən danışıb. Azerisport.az saytına açıqlamasında o, bunları söyləyib:
"Qarabağ" bu mövsüm yenə çempion olacaq. Mən bunu hələ mövsümün əvvəlindən demişəm".
Hüseynov Ağdam klubunun Avropa Liqasında İtaliya "Fiorentina"sına qalib gələcəyinə də inanır: "Məğlubedilməz komanda yoxdur. Ağdam klubu "Fiorentina"ya qalib gələ bilər. Əlbəttə, "Qarabağ" müdafiədə otursa, uduzacaq. Rəşad Sadıqovun yoxluğu komanda üçün böyük itkidir. Amma istənilən halda İtaliya klubu üzərində qələbəyə ümid edirəm".
"Qarabağ"da Dino Ndlovunun da oyunu xoşuma gəlir. Reynaldoya baxanda, o, daha yaxşı təsir bağışlayır. Braziliyalının vaxtı gedib. O, daha "Qarabağ"a faydalı deyil. Onun əvəzində daha gənc və perspektivli forvard oynamalıdır".
"Dəniz Yılmazın yığmamıza dəvət almasına normal yanaşıram. Amma o, yüksək səviyyəli hücumçu deyil. Əks halda Türkiyə yığmasına dəvət alardı. Orada lazım olmadığına görə, bizim yığmada oynamağa razı olub. Bizim Yılmazdan daha güclü hücumçularımız var. Sadəcə, onları görmürlər, inanmırlar. Bizimkilərə də ad lazımdır. D.Yılmaz da "Bursaspor"da oynayır".
"Ramil Şeydayevə gəlincə, o, "Trabzonspor"da oynamasa da, millidə əsas heyətdə meydana çıxır. Bizim zəif nöqtəmiz də elə budur. Öncə oyunçu "Trabzonspor"da heyətə düşməlidir ki, yığmaya da dəvət olunsun. Bununla Ramilin pis futbolçu olduğunu demək istəmirəm. "Trabzonspor"a keçibsə, deməli, yaxşı forvarddır. Sadəcə, üzərində işləməsi, orada oynaması lazımdır ki, yığmamıza da faydalı olsun. Onun əvəzində sabit oynayan hücumçuya dəvət göndərmək daha yaxşı olar".
"Azərbaycan futbolu kənardan necə görünür? Pis. Çempionatda 8 klub çıxış edirsə, başqa nə gözləmək olar ki? Türkiyədə Premyer Liqamızda neçə klubun oynadığını soruşanda, cavab verirəm ki, 8. Onlar gülürlər və deyirlər ki 8 komandalı çempionatda necə mübarizə aparmaq olar?"
