Qəbələdən 12-ci start, Qriqorçuk üçün yubiley
Azərbaycan kubokunda 2016/2017 mövsümünün 1/8 final mərhələsinin oyunlarına start verilib. Azerisport.az xəbər verir ki, yarışa bu mərhələdən başlayacaq “Qəbələ” 1/4 finala vəsiqə uğrunda matçda Birinci Divizion təmsilçisi “Zaqatala” ilə qarşılaşacaq.
Qəbələdə baş tutacaq oyun meydan sahiblərinin debütantla ilk görüşü olacaq. Bunadək kubok matçlarında 15 komanda ilə üz-üzə gələn “Qəbələ” özünün 16-cı rəqibini sınağa çəkəcək.
Azərbaycan kubokunda 2005/2006 mövsümündə debüt edən “Qəbələ” 12-ci dəfə bu yarışın start xəttinə çıxır. 11 mövsümdən birində finala (2013/2014), üçündə yarımfinaladək (2007/2008, 2008/2009, 2015/16) irəliləyən “qırmızı-qaralar” 4 dəfə 1/4 finalda (2010/2011, 2011/2012, 2012/2013, 2014/2015) mübarizəni dayandırıbsa, 3 dəfə 1/8 final səddini adlaya bilməyib. Bu, 2005/2006, 2006/2007 və 2009/2010 mövsümlərində yaşanıb.
Ölkə kubokunda indiyədək 47 oyun keçirən “Qəbələ” 22 dəfə qalib gəlib, 16 dəfə heç-heçə edib və yalnız 9 dəfə uduzub. Turnirdə 74 qol vuran komanda “Zaqatala”nın qapısına 1 dəfə yol tapsa, bu, yubiley topu olacaq.
Bu 47 qarşılaşmada “Qəbələ”nin heyətində 160 futbolçu meydana çıxıb. Komandanın rekordçusu Samir Zərgərovun hesabında 18 oyun var. Dodo 15, Viktor Mendi və Azər Həşimov hərəyə 13 kubok matçında forma geyiniblər. İndiki heyətdən Ürfan Abbasov hamıdan öndədir – 12 oyun. Elvin Camalovla Rafael Santos “Qəbələ”də 10-cu kubok oyununu "Zaqatala"ya qarşı keçirə bilər. Bunun üçün onların meydana çıxması kifayətdir. Kubokda vurulan 74 qola 43 futbolçu və avtoqol müəllifi olan 1 rəqib oyunçu imza atıb. “Qəbələ”nin heyətində ən çox qol sevinci yaşayan Kənan Kərimovdur – 7 qol. Vüsal Qarayev 5, Aleksey Qay, Viktor Mendi ilə İbrahim Hüseynov hərəyə 4 dəfə fərqləniblər.
“Zaqatala” ilə oyun baş məşqçi Roman Qriqorçuk üçün də əlamətdar olacaq. Ukraynalı mütəxəssis bu posta təyinatından sonra “Qəbələ” 100-cü – yubiley matçını keçirəcək. İndiyədək 99 qarşılaşmada komandaya rəhbərlik edən Qriqorçuk üç turnirdə iş başında olub. Bunların 65-i Premyer Liqaya, 27-si Avropa Liqasına, 7-si ölkə kubokuna təsadüf edib. Onun yetirmələri 46 qələbə qazanıb, 26 heç-heçə edib və 27 dəfə uduzub. 146 qolun sevincini yaşayan mütəxəssis 89 buraxılan qola üzülüb.
Xatırladaq ki, “Qəbələ” ötən mövsüm də kuboka dekabrın 3-də start vermişdi. Həmin gün 1/8 final mərhələsinin “Mil-Muğan”la oyununda “qırmızı-qaralar” 7 cavabsız qol vurmuşdu.
