Katalin Doman: Ən yaxşı illərimi Xəzər Lənkəranda keçirmişəm
Rumıniyanın "Politexnika Timişoara" klubunun yarımmüdafiəçisi Katalin Doman sabiq komandası "Xəzər Lənkəran"la bağlı xatirələrini bölüşüb. Azerisport.az saytına açıqlamasında o, bunları söyləyib:
"Karyeram ərzində yalnız Azərbaycanda legioner həyatı yaşamışam. Buna görə də ölkəniz həmişə diqqət mərkəzimdədir. Hətta deyərdim ki, ən yaxşı illərimi "Xəzər Lənkəran"da keçirmişəm. Orada iki il çıxış etdim və komanda üçün əlimdən gələni etməyə çalışdım. Buna görə də hazırda "Xəzər Lənkəran"ın fəaliyyətini dayandırmasına çox üzülürəm. Belə böyük bir komandanın indi mövcud olmaması məyusluq yaradır. Niyə belə olduğunu dəqiq bilməsəm də, istərdim ki, komanda yenidən bərpa olunsun. "Xəzər Lənkəran"la bağlı çox xatirəm var. Xüsusilə də "Neftçi"yə qarşı oyunlar. Bizim azarkeşlər üçün bu rəqibə qalib gəlmək həmişə vacib olub. Əksər vaxtlarda da buna nail olurduq. "Qarabağ"la oyunlarımız da maraqlı alınırdı. Bu komanda o dövrlərdə də güclü idi. İndi isə ardıcıl üç mövsümdür çempion olur. XL yenidən bərpa olunsa, oraya qayıtmağa hazıram. Fikrimcə, "Xəzər Lənkəran"sız çempionat əvvəlki kimi maraqlı deyil".
