Əsgər Abdullayev: Heyəti şəxsən özüm yığmışam, onlara inanıram
"Turan Tovuz"un baş məşqçisi Əsgər Abdullayev Azərbaycan Kubokunun 1/8 final mərhələsi çərçivəsində "Zirə"yə qarşı keçirəcəkləri oyun öncəsi azerisport.az saytının suallarını cavablandırıb.
- Kubok oyununa hazırlıq necə gedir?
- Həmişəki kimi, hazırlaşırıq, çalışırıq. Bizim üçün bu görüş yaxşı bir imtahandır. Premyer Liqa klubu ilə qarşılaşmağımız böyük bir məsuliyyət deməkdir. "Zirə" elitanı təmsil edirsə, təbii ki, bizdən güclüdür. Şübhəsiz ki, çətin oyun olacaq.
- Belə bir rəqiblə oyunda şanslarınız barədə nə deyə bilərsiniz?
- Özümüzü yaxşı tərəfdən göstərməyə çalışacağıq. "Zirə" cütün favoritidir. Rəqib ötən mövsümün vitse-çempionudur. Bu mövsüm də pis çıxış etmirlər. Oyunlarını görmüşəm. İntizamlı komandadır.
- Kubok oyunları elita və divizion klubları arasında ciddi fərq olduğunu göstərir. Bu oyunda necə olacaq?
- Bu turnirləri müqayisə etmək istəmirəm. Bu, mənim işim deyil. Amma motivasiyalıyıq. Hər komanda özünü yaxşı tərəfdən göstərmək istəyir. Biz də "Zirə"yə müqavimət göstərməyə çalışacağıq.
- Bu turnirdə hədəfiniz nədən ibarətdir?
- Mövsüm üçün əsas hədəfimiz Premyer Liqaya çıxmaqdır. Kuboka gəlincə, mümkün qədər irəliləmək istəyirik.
- Danışılmış oyunlara görə müvəqqəti futboldan kənarlaşdırılanlar arasında "Turan Tovuz"dan heç kimin adına rast gəlmədik...
- "Turan Tovuz"da belə şeylər olmayıb, olmayacaq da. Mən belə bir şeyi təsəvvür edə bilmirəm. Futbolçularım heç vaxt buna getməz. Biz təmiz futbol oynamaq, elitaya yüksəlmək istəyirik. Oyunçularıma inanıram.
- Amma hətta siyahıda adı yer alan futbolçulara da baş məşqçilərindən dəstək var...
- Kimisə inandırmağa çalışmaq, and içmək fikrim yoxdur. Bu söhbətdə hansısa futbolçumuzun adı hallansa belə, bununla bağlı hər cür yoxlama aparmağa hazırıq. Bu komandanı şəxsən özüm yığmışam. Digər klublarda belə oyunçuların tapılmasına gəlincə, biz öz işimizlə məşğuluq, digərlərinin işinə qarışmırıq. Bu, onların öz işidir. Məni ancaq "Tovuz Turan" narahat edir.
