Murad Ağayev: Neftçinin başqa hədəfi ola da bilməz
"Neftçi"nin yarımmüdafiəçisi Murad Ağayev Azərbaycan Kubokunun 1/8 final mərhələsi çərçivəsində "Şərurspor"a qarşı oyun öncəsi azerisport.az saytının suallarını cavablandırıb:
- "Şərurspor"u "Neftçi" üçün nə dərəcədə zəif rəqib saymaq olar?
- Xeyr, zəif rəqib olmur. Biz bu matça ciddi hazırlaşmışıq və qələbə qazanmaq istəyirik.
- Rəqib barədə nə bilirsiniz?
- "Şərurspor" futbolçularının özlərini yaxşı tərəfdən göstərməyə çalışacaqlarını yaxşı bilirik. Yəqin ki, onlar aşağı divizionda da yaxşı oyunçuların olduğunu isbatlamaq üçün səy göstərəcəklər. Amma biz qələbə qazanmalıyıq.
- Premyer Liqada autsayder olan komandanızda ab-hava o qədər də yaxşı deyil. Belə bir vəziyyətdə Birinci Divizion klubuna qalib gələcəyinizə inanırsınız?
- Sərgilədiyimiz oyuna görə narahat deyiləm. Düzdür, nəticələrimiz ürəkaçan deyil. Amam bizim də zamanımız gələcək. Vəziyyəti yaxşıya doğru dəyişəcəyimizə inanıram.
- Azarkeşlərin komandaya inamsızlığı sizə nə dərəcədə təsir edir?
- Onları başa düşürəm. Azarkeşlər də bizdən nəticə istəyirlər. Onlara demək istərdim ki, bir az da dözsünlər və bizim yenidən çempionluğa oynamağımızı görəcəklər. Qoy həm baş məşqçiyə, həm də bizə vaxt versinlər. Uğurlu nəticə qazanmaq üçün əlimizdən gələni edirik.
- "Neftçi"nin kubokdakı hədəfi nədən ibarət olacaq?
- Klubun hədəfi ancaq qalib gəlməkdir. Başqa hədəf ola da bilməz. Qələbə qazanmaq istəməsək, niyə meydana çıxmalıyıq ki?
- "Şərurspor"a məğlub olsaz, yenə belə deyəcəksiniz?
- Ümid edirəm ki, uduzmarıq. Bütün diqqətimizi qələbə qazanmağa yönəltmişik. Məğlubiyyətdən qorxmaq lazım deyil. Bu, böyük səhvdir.
- Qışda "Neftçi"də ciddi dəyişikliklər olacaq. Siz komandada qalacağınıza inanırsınız?
- Klubla müqaviləm var.
- "Qarabağ"la "Qəbələ"nin çempionluğa oynamasını autsayderlər qrupundan izləmək necədir?
- Əlbəttə, biz də liderlər qrupunda yer almaq istərdik. Ümid edirəm ki, bizim də Azərbaycan çempionu olacağımız vaxt gələcək. Nə vaxt, deyə bilmərəm. Amma mümkün qədər tez və "Neftçi" ilə çempionluğu bayram etmək istəyirəm.
