Elxan Abdullayev: Rəqibi ciddiyə almayacaq səviyyədə deyilik
"Neftçi"nin baş məşqçisi Elxan Abdullayev Azərbaycan Kubokunun 1/8 final mərhələsi çərçivəsində "Şərurspor"a qarşı keçirəcəkləri oyun öncəsi fikirlərini bölüşüb. Azerisport.az saytına açıqlamasında o, bunları söyləyib:
"Neftçi" həmişə olduğu kimi, yenə kubokda qarşısına yüksək hədəflər qoyub. Baxmayaraq ki, bu mövsüm komanda parlaq oyun sərgiləyə, azarkeşləri sevindirə bilmir. Bu, bizim hədəfimizi dəyişmir. Kubok matçına çox ciddi yanaşırıq. Rəqib Birinci Divizion klubu olsa da, biz özümüz o səviyyədə deyilik ki, rəqibi ciddiyə almayaq. Müsbət nəticə qazanmağa çalışacağıq. Rəqibi analiz etmişik. Tamamilə sürpriz bir komandadır. Səviyyə baxımından biz üstünük. Amma ustalıq və ağıl hər şeyi həll etmir. Rəqibin istək baxımından da bizi üstələməməsi lazımdır. Asan olmayacaq".
