Şahruddin Məhəmmədəliyev: Cəza almayacağıma əmin idim
"Qarabağ"ın qapıçısı Şahruddin Məhəmmədəliyevin azerisport.az saytına müsahibəsi
- Premyer Liqanın son turunda "Qəbələ"yə qarşı keçirdiyiniz oyundan sonra rəqibin kapitanı Rəşad Sadiqov bəyan etdi ki, siz qələbə qolunu bayram edərkən onun komanda yoldaşlarına qeyri-etik jest göstərmisiniz...
- Belə olmayıb. Dəqiq! Mən heç kimə jest göstərməmişəm. Sadəcə, komandamızın vurduğu qola sevinirdim.
- O, onu da bildirib ki, Şahruddin kimi jest nümayiş etdirəni döymək də olar, öldürmək də...
- Həmin müsahibəni görən kimi, Rəşada zəng etdim və onunla danışdım. O, üzr istədi və bildirdi ki, emosiyalarını qoruya bilməyib.
- AFFA İntizam Komitəsinin sizi cəzalandıracağı gözlənilsə də, bu, baş vermədi. Bəs siz cəza gözləyirdinizmi?
- Axı mən pis heç nə etməmişəm. Ona görə də məni cəzalandırmayacaqlarına əmin idim.
- Baş verənlər sizin psixoloji durumunuza təsir göstərməyəcək?
- Xeyr. Məni yaxşı tanıyanların hamısı dəstək nümayiş etdirdi. Mən onların bu dəstəyini hiss etdim.
- Bəs Qurban Qurbanov nə söylədi?
- O mənim elə bir hərəkət edib-etmədiyimi soruşdu. Mən də cavab verdim ki, elə etməmişəm.
- Sadiqovla da söhbətləşdiyinizi nəzərə alsaq, söhbəti bağlı elan etmək olar?
- Bəli, elədir. Mümkün qədər emosional olmamağa çalışıram. Sadəcə, qol zamanı bu barədə düşünmədim.
