Elnur Cəfərov: Robert Prosineçki mənim necə məşq etdiyimdən də xəbərdardır

Azərbaycanın gənclərdən ibarət yığma komandasının və Xorvatiyanın "Duqopolye" klubunun yarımmüdafiəçisi Elnur Cəfərovun azerisport.az saytına müsahibəsi

- Xorvatiyada işləriniz necə gedir?
- Hər şey yaxşıdır. Artıq Xorvatiya futbolunun reallıqlarına alışmışam. Demək olar ki, özümü burada yad hiss etmirəm. Baxmayaraq ki, burada elə də çox vaxt keçirməmişəm.

- Demək olar ki, əksər oyunlarda sonradan meydana çıxırsınız. Əvəzedici statusunuz sizi qane edir?
- Hələ ki, daha çox ikinci hissədə meydana çıxıram. Xorvatiyada özümü kənar hiss etməsəm də, Avropa futboluna hələ tam uyğunlaşmamışam. Ola bilsin ki, yaş amili nəyəsə mane olur.

- "Duqopolye" mövsümün əvvəlində lider idi, indi isə beşinci...
- Bəli, komandanın son nəticələri ürəkaçan deyil. Birinci dövrənin sonuna iki tur qalıb. Ümid edirəm ki, bu oyunlardan maksimum xalla ayrılacağıq. Birinci pillədəki komanda ilə xal fərqimiz elə də böyük deyil. Fikrimcə, qış fasiləsindən sonra komandamız daha yaxşı çıxış edəcək. Xorvatiya futbolunun elitasına vəsiqə qazanmaq istəyirik.

- Robert Prosineçki sizi ziyarət etməyib?
- Prosineçki Zaqrebdə yaşayır. Buradan 5-6 saatlıq məsafədədir. Amma bildiyimə görə, mənim çıxışımı mütəmadi izləyir.

- Necə?
- Burada çoxlu tanışı var. Həm də köməkçilərindən biri yanıma gəlmişdi. Bir sözlə, Prosineçki nəinki necə oynadığımı, hətta necə məşq etdiyimi də bilir.