Adil Şükürov: Avrokuboklara vəsiqə qazanmağa çalışacağıq
"Zirə"nin baş məşqçisi Adil Şükürov Azərbaycan Premyer Liqasının 13-cü turu çərçivəsində "İnter"ə qarşı keçirdikləri oyunu şərh edib. Azerisport.az xəbər verir ki, paytaxt klubunun çalışdırıcısı 1:1 hesabıyla bitən qarşılaşmadan sonra bunları söyləyib:
"İlk növbədə dünyasını dəyişən Şəhriyar Əliyevin ailəsinə başsağlığı verirəm. "İnter"lə oyuna gəlincə, bu rəqiblə görüşlərimiz həmişə maraqlı alınır. Bu gün komandamız qələbəni daha çox arzulayırdı. Uşaqlar sürətli oyuna üstünlük verdilər. Amma bəzi qol epizodlarından yararlana bilmədik. Zamanla bu çatışmazlıqların düzələcəyini düşünürəm. Əsas hədəf daha güclü və sabit komanda yaratmaqdır. Bu mövsüm UEFA-nın da qadağası olmadığından, avrokuboklara vəsiqə qazanmağa çalışacağıq. Qarşıda daha iki dövrə var və ümid edirəm ki, ilk üçlüklə aradakı fərqi azalda biləcəyik". (CBC)
